Manera ya anuncia, diamars atardi Prome Minister Evelyn Wever-Croes a biaha pa Hulanda principalmente pa reuni cu Secretario di Estado Alexandra van Huffelen. Motibo principal di e biahe ta pa trata e tema di pago di 5% bek na empleadonan publico. Diaranson 20 di juli e reunion a tuma luga na unda Prome Minister a trata na convence Hulanda pa e pago tuma luga fin di e luna aki manera cu Gobierno a anuncia despues, cu na mei ultimo, Hulanda a bay di acuerdo pa Gobierno di Aruba stop e recorte bou di condicionnan. Aruba a cumpli cu tur condicion.
Despues di su reunion cu Secretario di Estado van Huffelen, Prome Minister a declara:
“Mi a caba di sali di reunion cu Secretario di Estado Alexandra van Huffelen. Mi a haci tur lo posibel pa convenc’e, sinembargo mi no a logra. Mi a consulta cu Conseho di Minister na Aruba inmediatamente despues di e reunion. Conseho di Minister sinembargo no por warda mas. E situacion na Aruba ta hopi dificil. Costo di bida a aumenta debi na e guera di Ukraina.
Empleadonan ta entrega desde 1 di mei 2020. Gobierno a cumpli cu tur tur condicion. Hulanda no kier pa Parlamento cambia e ley pero esey ta contra nos principio di democracia parlamentario. Ademas, mira e cambio den su proporcionalidad: Aruba tin un maximo pa tur salario. Esnan cu wordo emplea entrante 1 di augustus tin un maximo di 130% di salario di e minister president. 329.000 florin pa aña. Esey ta e ley di Wever-Croes Norm. Pa loke ta e 7 personanan cu ta gana mas cu e norma, nan tin 5 aña pa baha nan salario te na e maximo. 5 aña ta un periodo rasonable pa e transicion.
E ley tey. E reglanan tey. Abusonan no por tuma luga mas. Pues nos a cumpli cu e esencia di e ley. Loke sigur no ta husto ta pa casi 5000 mama y tata di famia cu ta traha den Gobierno, den fundacionnan y den companianan estatal wordo perhudica pa esaki.
P’esey, Conseho di Minister a dicidi pa paga e 5% na empleadonan publico y semi publico entrante fin di e luna aki. Cu esaki nos ta spera cu por yuda pa cu e costo di bida halto na Aruba causa pa e guera di Ukraina. “Gobierno ta carga su responsabilidad y lo keda na mesa cu Hulanda y sali di e empase cu nos ta den.
Nos ta gradici sindicatonan pa nan lucha. Y nos ta gradici empleadonan pa nan sacrificio y solidaridad”.
