Premier Evelyn Wever – Croes:
Un biaha pa siman e cifranan di Covid ta wordo publica. Te cu diabierna 10 di juni tawata tin 848 caso activo compara cu e siman prome cu tabata tin 701 caso activo. Un aumento di 147. Prome Minister Evelyn Wever-Croes durante Conferencia di Prensa di Gobierno di Aruba a duna di conoce cu e siman aki ta mustra cu e casonan di Covid 19 a stabilisa y no a bay mas halto, sinembargo e ta un cantididad cu ta trece preocupacion.
Situacion na Hospital
Actualmente tin 13 persona den hospital di cual 1 ta den cuido intensivo. Esaki ta un aumento compara cu siman anterior cu tabatin 10 persona den hospital y 1 den cuido intensivo.
Caso di fayecimento
Siman pasa no tabatin personanan cu a fayece, pero e siman aki ya a mira 3 caso di personanan cu a fayece cu Covid. Gobierno ta manda palabra di profundo condolencia na e famianan. Prome Minister a duna di conoce cu a constata cu den e casonan di fayecimento, ta trata di personanan di edad avansa y cu salud delicado. P’esey ta bolbe haci apelacion na comunidad pa cuida nan mes pa sigui cuida nan sernan keri. Laba man frecuentemente, uza tapaboca ora cu ta bay luganan cu hopi hende of luganan cera.
Vacuna pa combati e virus
Ta keda resalta cu e vacuna ta e miho forma pa combati e efectonan di e virus aki. Vacuna talves no ta evita cu bo ta haya e Covid, pero si e ta yuda combati e efectonan. “Teniendo na cuenta e grado di vacunacion ta na Aruba, mi kier pidi y invita tur esnan riba 60 aña, pa haci uzo di e oportunidad pa haya e di dos ‘booster shot’”, Prome Minister a expresa.
Premier Wever – Croes a informa cu te na e momentonan aki solamente 10% di e comunidad riba 60 aña a busca e di dos booster (e posibilidad ta habri solamente pa esnan riba 60 aña). Pa loke ta trata e prome booster shot, ta mira cu 55% di esnan riba 60 aña ya a busk’e.
Pa loke ta trata e populacion riba 18 aña, tin un grado di vacunacion di 80%, pero ya pa e prome booster shot, esaki ta solamente 37%. Den e caso aki tambe Prome Minister ta haci apelacion na e grupo di personanan aki pa busca nan prome booster cu por yuda proteha contra e virus.
“E unico manera pa Aruba ta progresa ta si nos cada uno duna di nos parti. Covid ta un enemigo invisibel, fuerte, cruel, pero e arma pa bring’e ta den man di nos cada uno, p’esey ban sigui cuida nos mes y nos famia”, Prome Minister Evelyn Wever-Croes a termina bisando.