Riba djadumingu 12 di novèmber for di 16:00 or te 18:30 or apertura festivo di Siman di Buki pa Mucha ta tuma lugá den oula di SGB na Playa. Organisashon di Siman di Buki pa Mucha ta den man di Biblioteka Públiko Boneiru. E tema di e aña akí ta ‘Na mi kas’.
Vários outor di buki pa mucha ta presente na e apertura. Ta trata di Jenny Coffy, Giovanni Gijsbertha, Vianella Girigorie, Denice De Jong Rekwest. E kontadó di kuenta Guinetta de Palm i e direktor/outor di senario lokal Sendion Balentin tambe ta presente.
Spesialmente pa Siman di Buki pa Mucha, Giovanni Gijsbertha a skirbi e buki ‘Fakansi den pasado’. Durante e apertura ta ’batisá e buki ‘Fakansi den pasado’ ofisialmente. E muchanan di ACE Kids Club ta duna un presentashon durante e apertura. Ku kanto i baile nan ta konta un kuenta. ACE Kids Club a traha un kantika i un videoclip pa Siman di Buki pa Mucha 2023.
Den siman di 13 di novèmber 2023 e outornan, e kontadó di kuenta i e direktor/outor di senario ta bishitá diferente skol. Dia 14 di novèmber tin un aktividat spesial pa mayor na biblioteka. Den un seshon interaktivo ekspertonan ta duna tep na mayor kon bo ta kambia un kas, hasié un neishi kómodo i kaluroso. Ta tene e seshon di 18:00 or te 19:00 or.
Durante Siman di Buki pa Mucha klientenan ta haña e buki ‘Fakansi den pasado’ pa bai kuné grátis ora nan hasi kompra na balor di 15 dòler na libreria Bruna òf libreria Del Mar. Dia 18 di novèmber ta klousurá Siman di Buki pa Mucha na libreria Bruna ku un ‘disco’ di lèter.
