Cambionan anuncia pa Gobierno ta enfoca riba e balansa entre bienestar economico manteniendo e responsabilidad pa salud di un y tur
Recientemente durante di rueda di prensa di Gobierno di Aruba, CEO di Aruba Tourism Authority (ATA) sra. Ronella Tjin Asjoe-Croes a anuncia e cambionan di mas recien den cuadro di stimulacion di turismo y impulso economico.
Actualmente nos ta den e ultimo siman di october, ora cu analisa e proyeccionnan pa turismo di luna di september 2020 compara cu e cifranan real, esaki ta indica un adelanto. E desaroyo aki a bay man den man cu e hecho cu a sa di registra menos caso positivo di Covid na Aruba. Sinembargo analisando e cifranan pa luna di october 2020, ta ilustra cu e cifranan aki ta core bou di e proyeccionnan conservativo pa october 2020, cual ta un preocupacion. Considerando esaki y resultadonan di casonan di importacion, tabata importante pa mira kico por sigui haci pa stimula ingreso di bishitantenan y stimula economia. Como tal tin algun decision cu a wordo tuma.
Apertura di mercadonan turistico
Mercadonan di Sur America, Centro America, Mexico, Republica Dominicana y Haití ta habri entrante prome di december 2020. Esakinan ta mercadonan cu te na e momentonan aki ta cera, pues awor ta fiha fecha di reapertura conforme locual ta delinea cu lo ta un maneho prudente pa e regionnan y paisnan aki. Frontera entre Aruba y Venezuela ta keda cera.
Impacto
Un reapertura na december di e paisnan aki, principalmente Latino America, lo por conduci na un total di entre 2000 – 2500 bishitante adicional den luna di december. Locual cu por spera na 2021 ta entre 2300 – 2800 bishitante di Latino America, mensualmente a base di proyeccionnan.
E proyeccionnan aki ta basa riba diferente scenario mara na cada pais di cual ta atrae bishitantenan.
Apertura di Latino America ta masha spera/anticipa pa nos localnan tambe y nos ta consciente cu hopi ta wardando reapertura di Colombia. Esaki tambe ta conta pa e reapertura di Republica Dominicana y Haití, pa cual lo spera di mira adelanto den biahe di localnan tambe.
