Na kunuku di Juni La Croes Ku tema “Sembr’Awe Pa Kosechá Mañan”
Sekshon di Kultura, Arte i Literatura (SKAL) i Komishon Di Luna Yen ta kontinuá ku aktividatnan segun su kalènder kultural. Riba djamars 7 di mart 2023 lo tin e evento ‘E Anochi Ku Luna Yen’ di 7or pa 9or di anochi na kunuku di Juni La Croes. E tema di e anochi ta “Sembr’Awe Pa Kosechá Mañan“. Un anochi ku poesia bou di e luna yen. Anochi ku Luna Yen ta un evento sosial di pueblo i pa pueblo, pues un i tur ta kordialmente bonbiní.
E tema “Sembr’Awe Pa Kosechá Mañan” ta bini di un kampaña ku e mesun nòmber i ta forma parti di e programa ‘Bèrdura i Fruta’ di departamento di Salubridat Públiko. Na 2018 e departamento a kuminsá ku esaki. Meta di e programa akí ta pa mustra komunidat riba importansia di planta i kome bèrdura i fruta. Bèrdura i fruta fresku ta parti di un estilo di bida salú. Un estilo di bida salú ta importante pa prevení malesa di durashon largu manera sobrepeso serio, problema ku kurason, diabétis. Salubridat Públiko ke stimulá siudadanonan tambe pa kuida nan mes bon.
Personanan di Rincon ku mester di transporte por hasi uso di un bus ku ta sali for di pariba di misa di Rincon 18:00-or i despues tambe ta pasa na SKAL 18:30-or pa buska e personanan di Playa ku mester di transporte. Ta pidi tur esnan ku ke hasi uso di e servisio di transporte pa hasi reservashon na tempu na SKAL of yama +599 715 5323. Di e forma aki nos por hiba un mihó komunikashon ku otro.
Manera semper, ta keda liber na kada bishitante pa trese algu di boka dushi pa kompartí ku otro bishitantenan i un súplika pa tur hende bini ku nan propio stul. No neglishá bo kapasidat i bin demostrá ku bo por. Nos ta apresiá i respetá tur obra, ku eksepshon di palabranan bulgar, polítika, problemanan personal i tur loke ku no ta kuadra ku e meta di e evento.
Anochi ku Luna Yen ta un inisiativa ku a nase den pasado for di algun siudadano ku gran pashon pa nos idioma papiamentu. SKAL ta keda pone énfasis ku meta prinsipal di e evento pa stimulá otro pa skirbi, deklamá, konta storia, kanta òf presentá obranan kòrtiku na papiamentu.
Pa mas informashon por tuma por tuma kontakto ku kolaboradónan:
Magali Sumter; +599 9 565 0947
Ubaldo Anthony; +599 717 4935
Orlando Francisca; +599 786 2131 òf +599 7962131
SKAL; +599 717 3616