Anochi ku luna yen djaluna 19 di ougùstùs 2024 patras di kas di kuido ku e tema luna yen i grandi ku nos grandinan

Djaluna 19 di ougùstùs 2024 tin e evento ‘Anochi Ku Luna Yen’ di 19:00 or –
21:00 or patras di Kas di Kuido na Playa, ku e tema ‘Luna yen i grandi ku nos grandinan’. Por
parker outo den e área di Parke Libertat i e área di dentista Hagens. Personal di Kas di Kuido
ta para warda e bishitantenan di Luna Yen patras di e instituto pa dirigí nan na e lugá di e
evento.
Anochi ku Luna Yen’ ta un evento ku entre otro deklamashon di poesia, kontamentu di
kuenta den lus di luna. E ta un un evento sosial di pueblo i pa pueblo, pues un i tur ta
kordialmente bonbiní. Ta un di e aktividatnan ku Sekshon di Kultura, Arte i Literatura, SKAL,
tin den su agènda kultural.
Hende di Rincon òf Playa ku tin mester di transporte, por hasi uso di un bùs ku ta sali for di
Rincon 18:00 pa buska hende. E bùs akí ta pasa 18:30 na SKAL na Playa pa buska hende i
sali despues rumbo pa Kas di Kuido. Ta pidi tur esnan ku ke hasi uso di e servisio di bùs, pa
reservá na tempu na SKAL òf yama +599 715 5323. Asina nos por sa kuantu hende mester
di transporte.
Manera semper, ta keda liber na kada bishitante pa trese algu di boka dushi pa kompartí ku
otro bishitante. Ta supliká tur hende bini ku nan propio stul. No balotá bo talento i bin
demostrá ku bo por. Nos ta apresiá i respetá tur presentashon pero tin sierto regla sí. Nos no
ta tolerá palabra bulgar, politikeria, atake personal i tur otro kos ku no ta kuadra ku meta di e
evento.
Anochi ku Luna Yen ta un inisiativa ku a nase den pasado for di algun siudadano ku gran
pashon pa nos idioma papiamentu. SKAL ta keda pone énfasis ku meta prinsipal di e evento
ta pa stimulá otro pa skirbi, deklamá, konta kuenta, kanta òf presentá obranan kòrtiku na
papiamentu.