Djaweps 25 di yanüari 2024 tin e evento ‘Anochi Ku Luna Yen’ di 19:00 – 21:00 or na Antriol Pariba na kas di Chòn i Norma Theodora, Kaya Rafaela 21. E tema di e anochi ta ‘Ban kana pa nos yega.’ ‘Anochi ku Luna Yen’ ta un evento ku entre otro deklamashon di poesia, kontamentu di kuenta den lus di luna. Na aprel di e aña aki ‘Anochi ku Luna Yen’ ta selebrá su aniversario di 20 aña. Binti aña pasá Regina ‘Uchi’Frans i su amiga Munye a para na kuna di ‘Anochi ku Luna Yen.’ Durante e enkuentro di 25 di yanüari awor, Ubaldo Anthony, miembro di komishon di ‘Anochi ku Luna Yen’ ta elaborá tokante tema di e anochi.
‘Anochi ku Luna Yen’ ta un evento sosial di pueblo i pa pueblo, pues un i tur ta kordialmente bonbiní. Ta un di e aktividatnan ku Sekshon di Kultura, Arte i Literatura, SKAL, tin den nan agènda kultural.
Personanan di Playa òf Rincon ku tin mester di transporte, por hasi uso di un bùs ku ta sali for di Rincon 18:00 or i 18:30 or di Playa rumbo pa Antriol Pariba. Ta pidi tur esnan ku ke hasi uso di e servisio di bùs, pa reservá na tempu na SKAL òf yama +599 715 5323. Asina nos por sa kuantu hende mester di transporte.
Manera semper, ta keda liber na kada bishitante pa trese algu di boka dushi pa kompartí ku otro bishitante. Ta supliká tur hende bini ku nan propio stul. No balotá bo talento i bin demostrá ku bo por. Nos ta apresiá i respetá tur presentashon pero tin sierto regla sí. Nos no ta tolerá palabra bulgar, politikeria, atake personal i tur otro kos ku no ta kuadra ku meta di e evento.
Anochi ku Luna Yen ta un inisiativa ku a nase den pasado for di algun siudadano ku gran pashon pa nos idioma papiamentu. SKAL ta keda pone énfasis ku meta prinsipal di e evento ta pa stimulá otro pa skirbi, deklamá, konta kuenta, kanta òf presentá obranan kòrtiku na papiamentu.
Pa mas informashon por tuma por tuma kontakto ku kolaboradónan:
Magali Sumter +599 9 565 0947
Ubaldo Anthony +599 717 4935
Orlando Francisca 599 786 2131 òf +599 7962131
SKAL +599 715 5323