“Hunto, Gobierno di Aruba, Parlamento di Aruba y pueblo di Aruba, ta logra trece progreso y bienestar pa henter nos comunidad” Diamars mainta, 12 di September, a tuma luga e apertura di Aña Parlamentario 2023-2024. Na Parlamento, a tuma luga e ceremonia na unda S.E. Gobernador di Aruba, Alfonso Boekhoudt a declara e aña Parlamentario habri. Esaki ta e di 38 Aña Parlamentario di Pais Aruba y e ta un momento hopi solemne pa e organo di mas importante di Pais Aruba.
Prome Minister Evelyn Wever-Croes e expresa cu S.E. Gobernador a duna un discurso balansa na unda cu S.E. Gobernador a refleha riba tur loke ta biba den nos comunidad. S.E. Gobernador a enfatisa cu apesar cu Aruba ta den recuperacion, keto bay Aruba tin retonan y ta solamente trahando hunto y cu e meta central di hiba nos pais dilanti, nos lo crea un futuro miho y mas sostenibel.
“Aruba ta den recuperacion, pero nos no ta ainda unda nos mester ta. Nos kier pa tur hende sinti e progreso y bienestar cu Gobierno di Aruba kier trece pa Aruba. Esaki S.E. Gobernador a elabora hopi balansa riba cada area di maneho den gobernacion”, Prome Minister a expresa, Prome Minister a remarca cu ta premira un aña Parlamentario nobo sumamente fructifero y positivo pa Aruba. Un aña na unda cu tin desicionnan importante cu mester tuma riba tereno financiero y negociacion cu Hulanda. Tin hopi ley den proceso pa wordo trata den Parlamento sperando e sosten di Parlamento. Pero esaki ta tambe e aña na unda cu proyectonan mester wordo concretisa y den esaki Parlamento ta parti hopi importante.
“Mi ta desea tur parlamentario hopi exito y sabiduria y tambe hopi pasenshi den e aña Parlamentario aki. Manera Presidente di Parlamento, Edgard Vrolijk tambe a menciona, ta den sala di Parlamento e decisionnan grandi pa nos pais ta wordo tuma. Mas uni nos ta, mas nos ta logra pa nos pais. Den nomber di Gobierno di Aruba, mi ta desea tur Parlamentario un bon y fructifero Aña Parlamentario 2023-2024. Hunto, Gobierno di Aruba, Parlamento di Aruba y pueblo di Aruba, ta logra trece progreso y bienestar pa henter nos comunidad.
