Riba prome di september aña escolar 2021-2022 ta inicia oficalmente pa tur alumnonan na Aruba. E dia aki ta uno sumamente importante y positivo pa tur alumno y nan respectivo mayor. Fraccion di MAS kier desea tur alumno hopi exito, dedicacion, perserverancia y sabiduria pa loke ta nan carera escolar.
Pa e educadornan e situacion actual ta rekeri aun mas dedicacion, pasenshi, sabiduria y determinacion, pa asina guia e alumnonan y eventualmente nan respectivo mayor. Na mesun momento mi kier elabora riba algun di e retonan y incertidumbre pa e mundo di educacion. E retonan y incertidumbre ta di diferente indole.
‘Landspakket: Onderwijs’
Un delegacion consistiendo di expertonan di Hulanda, Aruba, Corsou y St. Maarten a haci un investigacion di henter e sistema educativo. Varios aspecto a keda analiza, e.o: e calidad educativo, acoplacion entre educacion y mundo laboral, eficiencia y eficacia di financiamento den educacion, fortalace y mehora e calidad den enseñansa door di supervision efectivo di parti di entre otro departamento di inspeccion di enseñansa. Den luna di oktober lo entrega un ‘tussenrapportage’ di e investigacion. Loke ta crucial cu a base di e resultado di e investigacion lo desaroya medidanan cu lo keda implementa den mundo di educacion.
Edificionan
Ta un hecho cu varios scol ta rekeri di un mantencion grandi of renobacion. Varios scol a sa di acerca comercio, organisacionnan den exterior pa ayudo of a sa di recauda fondo, pa asina drecha te unda e medionan financiero ta duna. Tin varios scol cu ta den un localidad temporal pa varios aña y e parti mas tristo ta cu te na e momento aki no lo tin un solucion riba un termino cortico. E parti mas fastioso ta cu e situacion financiero ta critico, pero tin algun di e scolnan cu e placa tabata presupuesta, pero door di otro prioridad of capricho a destina e suma aki den un otro proyecto.
Educacion
Pa e educacion ta atractivo y efectivo pa e alumnonan nos scolnan mester ta dispone di medionan digital. Medionan cu ta motiva, reta y stimula e desaroyo, tanto riba e tereno di siñamento, den nan bida cotidiano y nan futuro trabou. Tambe ta di vital importancia pa inverti structuralmente den e profesionalisacion di e educadornan. Entre otro: nivel didacto, contenido y conocemento di ICT.
E tristo realidad di nos educacion ta cu mayoria scol no ta dispone di e medionan digital y tampoco por papia di un inversion structural pa loke ta profesionalisacion di e educadornan. Trahadonan di limpieza
Desde inicio di 2020 ta reina un situacion tenso entre SKOA y e Minister demisionario di Enseñansa. Esunnan perhudica door di e disputa aki ta e trahadonan di limpieza. E trahadonan aki tin mas cu un aña y mey den incertidumbre si nan lo mantene nan trabou y
naturalmente nan entrada.
E tareanan di e trahadonan di limpieza a bira hopi mas intensivo desde cu mundo a haya su mes confronta cu e pandemia di COVID-19. E trahadonan di limpieza ta hunga un rol vital pa salvaguardia y percura pa e scolnan por cumpli cu e medidanan di higiena stipula door di DVG.
Algun siman atras tambe a presenta un situacion na unda e trahadonan di limpieza di DPS a keda informa cu nan convenio laboral no lo keda prolonga.
Structura di cuido
Pa un alumno por tin exito durante su carera escolar, mester existi un balans entre e parti cognitivo y su parti social-emocional. Un alumno cu tin un desbalansa no por funciona mane debe ser. Investigacion a mustra cu e cantidad di alumnonan cu ta rekeri di ayudo emocional social den scol a conoce un crecemento substancial. E parti lamentable den e situacion aki ta cu cierto scolnan no ta dispone di un trahado social mas den scol y of na momento cu scol manda un of mas alumno pa un instancia externo, e tempo di espera ta demasiado largo. Esaki den mayoria caso ta debi na falta di personal.
Minister di Educacion
Na e momento aki ta den e proceso pa e formacion di coalicion 2021-20xc25. E unico informe cu ta dispone di dje ta cu e cartera di Enseñansa lo ta pa Partido MEP. Ta sumamente importante y esencial pa e Ministro nobo di Enseñansa por delinea e maneho cu e lo hiba mas pronto posible. E ingredientenan mas importante ta y lo keda un bon comunicacion y participacion entre e Minister y e mundo di enseñansa. Tin cu subraya cu dicho ingredientenan tabata cu vacacion durante e ultimo 3 aña y mey.
E parlamentario Aquannette Gunn a subraya cu e condicionnan esencial ta keda un reto, manera e.o: un curiculo actualiza, e infrastructura, e structura di cuido, e ambiente di siñamento, e medionan di instruccion, condicion laboral di docente (manera profesionalisacion di docente, tamaño di e klasnan, sosten di e personal den e klasnan), mecanismo di sosten manera eficiencia di e sistematica di financiamento, cultura, comunicacion cu e stakeholdernan, maneho anticua y ley anticua, dato y un sistema di monitoreo den su totalidad.
Educacion ta complica, pero si tur nanishi ta mira den e mesun direccion y tin e disponibilidad di tur esnan envolvi nos por trece un cambio sostenibel y duradero.
