TCB ta informá
E festival di ròm nobo i di mas eksitante den Karibe tin un partner nobo aserka: American Airlines i e ròm lokal di Boneiru: Spirit of Bonaire. American Airlines, e kompania di aviashon mas grandi na mundu, ku ta ehekutá buelo nòn-stòp for di Miami pa Boneiru, ta un partner nobo di e festival di ròm ku ta dura un siman na Hulanda Karibense.
E promé Siman di Ròm Boneiru ta planiá pa 14 te 17 di yüni, ku un seri di evento riba henter nos isla. ‘For di komienso di nos aktividatnan na Boneiru na aña 2018, nos a keda fortifiká nos presensia lokal, awor akí durante ‘high season’ ku buelonan direkto for di nos punto sentral di konekshon na Miami’, segun deklarashon di Marvin Alvarez, e mènedjer di benta regional pa área karibense, Amérika Latino i Guyana. ‘American Airlines ta orguyoso di su kompromiso di mas ku 50 aña ku área karibense ku buelo pa 35 destinashon den region, miéntras ku e kantidat ei ta sigui krese.’
E festival ta kuminsá ku un fiesta di apertura, siguí pa un kompetensia di kòktel ku e mihó bartèndernan di Boneiru na Tiki & Co, e mihó bar di kòktel na nos isla, un lùnch ku hopi ròm, un happy hour bon sasoná ku ròm, un eksperensia kulinario ku vários plato, siguí pa un evento ku un kombinashon di ròm i sigá.
‘Nos ta hopi kontentu ku nos por yama un di nos partnernan di aviashon mas importante American Airlines i nos ròm lokal Spirit of Bonaire, konosí pa motibu di Ròm Sorobon i Tekibon, bon biní na nos promé Siman di Ròm anual na Boneiru’, segun Miles Mercera, direktor di Tourism Corporation Bonaire. ‘Esaki ta brinda tremendo posibilidatnan pa biaheronan pa eksperensiá nos bunita isla. Kolaborashon i ‘partnership’, esei ta loke e siman di ròm tin di haber kuné.’
