Joshuar Gomez a publica su buki ‘Amen cu sanger’ na 2020 via Red Soil publishing. Joshuar a bishita biblioteca pa haci entrega di 5 ehemplar extra di su buki pa circula bou miembronan di biblioteca. E buki ‘Amen cu sanger‘ a keda entrega na sra. Astrid Britten, directora di Biblioteca Nacional Aruba.
Den produccion di su buki Joshuar Gomez a team-up cu Zulaika Fernandes Perna Silva, Mila Zambrano, Karin Tordecilla y Luis Anibal Villegas.
‘Amen cu sanger’ ta e storia di Alex, su experencianan, emocionnan y e manera con e ta wak e cosnan cu ta sosode, for di su perspectiva como un hoben homosexual na Aruba. Alex ta un hoben cu ta lanta den un cas caminda tin abuso emocional ta tuma lugar, un hoben cu no por depende riba su mayornan. Lesadornan por sigui e desaroyo personal di Alex. Den un entrevista cu matutino Bon Dia Gomez ta comenta cu “… Mi ta kere cu ta ora pa e experencianan LGBT wordo conta for di perspectivanan crioyo. Storianan di nos mesun hendenan, conta den nos propio lenga Papiamento…” Cada capitulo ta introduci personahenan cu e lesador Arubiano por facilmente reconoce of identifica su mes cu ne. Gomez ta conta e storia di Alex den un estilo fuerte y directo cu ta gara e lesador mesora.
E autor ta cu vakantie na Aruba y ta haci uso di e oportunidad pa presenta su obra. Actualmente e ta biba na Den Haag, Hulanda caminda e ta studia ‘Media, Kunst en Architectuur na universidad. E buki ta na benta na librerianan local. Por lesa e buki na biblioteca y miembronan por fia e buki.
