Djamars anochi 11 di yüni Konseho Insular unánimamente a bai di akuerdo
ku e tres kambionan proponé den e Ordenansa di Impuesto di Turista 2022. E kambionan
akí ta drenta na vigor for di 1 di yüli kaba, di manera ku partikularmente e Yunan di nos
Isla por probechá di e redukshon di gastu akí e próksimo vakansi grandi akí.
Rapòrt di evaluashon
Na luna di òktober 2023 un komishon di evaluashon a proponé e kambionan akí. E
komishon di evaluashon tabata konsistí di vários representante di Entidat Públiko Boneiru,
entre otro ekspertonan finansiero, hurídiko i ekonómiko, i interesadonan (turístiko)
prominente, manera TCB, BONHATA i IND. Den e evaluashon a inkluí e puntonan di
evaluashon di aña 2022, pero tambe un evaluashon profundo di tur e opheshonnan i
remarkenan di e interesadonan. Ehekutabilidat efisiente tabata un kriterio importante den
e proposishon, pero e sistema di impuesto mester ta hustu i bon pensá tambe.
Tres kambio ta drenta na vigor entrante 1 di yüli
E prome tres kambionan ku nan a aprobá ta kambionan intermedio, antisipando e
revishon general di e Impuesto di Turista, ku nan ta trahando pa logra riba término largu.
E tres kambionan ku nan ta implementá entrante 1 di yüli ta:
1. Un tarifa redusí di $10 pa yunan di nos isla ku no ta biba na Boneiru
2. Un eksonerashon pa tur studiante boneriano ku ta studia fultaim den eksterior
3. Ekstenshon di balides di e impuesto te un (1) luna.
Durante e lunanan binidero nan ta bai elaborá e otro kambionan pa loke ta trata
ehekutabilidat i faktibilidat hurídiko. Pa medio di dekreto insular ta stipulá e fecha ku e
kambionan akí ta drenta na vigor.
Proseso di deklarashon online
For di 30 di yüni e kambionan ta visibel online i e gruponan di enfoke akí por hasi
deklarashon pa yegadanan for di 1 di yüli. Pa tur grupo di enfoke eksistente kaba, for di 7
dia promé ku yegada ta posibel pa haña nan QR-code di akseso online via e wèpsait
https://tourismtax.bonairegov.com di Entidat Públiko Boneiru. Paga tinu ku ta riba e
wèpsait akí bo ta hasi bo deklarashon i tene kuidou ku wèpsaitnan di rebendedó ku ta pidi
hopi sèn pa nan servisio. Nunka no paga mas ku US$ 75. Durante e deklarashon nan ta
indiká e dokumentunan di prueba nesesario ku bo tin mester pa bini na remarke pa un
tarifa redusí òf pa eksonerashon. Na yegada nan ta kontrolá e dokumentunan akí. Si e
dokumentunan di prueba no ta kumpli ku loke ta rekerí, bo tin ku paga e suma kompleto.
Sintimentu di hustisia
‘Tabata reina un sintimentu grandi di inhustisia serka e Yunan di nos Isla pa motibu ku, si
nan ta biba pafó di e anterior Antia Hulandes, nan mester a paga e tarifa kompleto di $ 75
pa bin kas i paga di nobo si durante nan estadia nan kier a bishitá famia na e otro islanan’,
segun diputado Abraham. ‘Nos ta spera ku debí na e kambionan akí, nan ta haña nan
sintimentu di hustisia bèk.’