Algo special na caminda: Retrograde Ritual na Hilton Aruba

Instructor di Yoga, Maria Pucci di TopFit, lo presenta dos sesion di Retrograde Ritual na Hilton Aruba Caribbean Resort & Casino, riba 8 y 15 di September, 2023. Esaki lo tuma luga banda di costa di lama na Eforea beach, e Retrograde Ritual ta primiti di brinda un bon meditacion, cual sigur lo resulta den yuda reduci stress, ansiedad y pa calma bo mente. Ambos evento lo ta habri pa bishitantenan di e resort, turistanan y localnan totalmente gratis, sin necesidad di haci reservacion.

E meditacion lo inicia pa 6:30PM y lo inclui Tibetan Sounds, pa un experiencia magico y curativo, esaki lo yuda e participantenan pa alivia nan humor y turbulencia mental.

Maria Pucci di TopFit ta conduci e sesionnan aki cada bes cu e planeta Mercurio ta drenta den loke ta conoci manera un ‘Retrograde’, cual lo sosode tres biaha den 2023, na April cu a pasa, September awor y December venidero. Segun e practica antiguo aki di astrologia, Mercury Retrograde ta ora cu e planeta ta move den un forma cu ta afecta y influencia nos bienestar general.

Kico por spera: Un yoga mat, awa y serbete ta obtenibel pa tur participante. Bishitantenan por selecta nan lugar den santo, haci nan mes comfortabel y sigui tur instruccion di Maria su stem, visualisacion, y sentimento pa drenta den un estado transcendente y calmo.