Tourism Corporation Bonaire ta sostené e intento na luna di mart na e mihó sitio di mundu pa buseo na kosta
Tourism Corporation Bonaire (TCB) a duna su sosten na e intento di Rekòr Mundial di Freediving 2023 ku a tuma lugá dia 25 di mart na Boneiru. E kampion mundial ruso di freediving Alexey Molchanov a hasi su intento via e organisashon ofisial di freediving International Association for the Development of Apnea (AIDA), kaminda el a representá Servia i e bandera internashonal.
Molchanov, ku den e mundu di buseo ta konosí komo ‘The Machine’ i kende ta e freediver ku mas tantu kurashi den historia, tin kustumber di kibra rekòr for di tempu ku e tin sinku aña. Riba djasabra 25 di mart Alexey Molchanov a kibra e rekòr mundial den Variable Weight (VWT) na momentu ku el a baha te na un profundidat di 151 meter, pero e no a stòp einan. Dia 28 di mart el a hasi un último intento i el a reta su mes ku komo meta pa kibra su propio rekòr mundial nobo, i el a logra. Riba su Instagram e atleta a kompartí: “Awe mi a sambuyá bai te na 156 meter / 511 pia na e isla Boneiru i ku esaki mi a establesé un rekòr mundial nobo den disiplina di Variable Weight. Mi a baha ku peso èkstra i mi a subi bèk ku un ‘monofin’. Esaki a dura 4 minüt i 27 sekònde.” Su prestashon ta un muestra inkreibel di resistensia i determinashon humano, kaminda nos isla Boneiru ta sigui prueba su mes komo un destinashon di freediving di klase internashonal ku resultadonan ku ta kibra rekòr.
Nos isla tabata e base tambe pa hopi otro prestashon remarkabel, ku Eric van Riet Paap kende a establesé un rekòr nashonal nobo den Variable Weight (VWT) pa Hulanda ku un dùik te na 305 pia (93 meter), miéntras ku Brandon Best a establesé un rekòr nashonal nobo den Variable Weight pa Merka ku un dùik te na 170 pia (52 meter).
“E éksito di e evento te ku awor i e dùikmentu di kibra rekòr di e atleta ta pone énfasis riba e kapasidatnan inkreibel di e kurpa humano i e forsa di dedikashon i perseveransia”, segun Carlos Coste di Blue Classroom. “Tur esaki lo no tabata posibel sin e sosten kompleto di Tourism Corporation Bonaire, STINAPA, STCB, Plaza Beach Resort i hopi otro tremendo spònser i boluntario. Nos ta ekspresá nos mas profundo gratitut na tur hende ku a ofresé nan tempu, dedikashon i ekspertisio pa salbaguardá siguridat di e atletanan durante nan intentonan pa kibra rekòr i pa hasi e evento akí un éksito enorme”.
“Nos ta kontentu ku Alexey i otro aventureronan a wak den direkshon di e eko-paradiso Boneiru, no solamente pa mustra nan talentonan, pero tambe pa skirbi historia na nos isla”, segun Miles Mercera, direktor di Tourism Corporation Bonaire. “Nos laman protehá i bírgen a krea e mihó esenario pa e prestashon di freediving akí i el a yuda hopi atleta pa un biaha mas añadí un mérito na nan portofolio profeshonal di freediving.”
AIDA ta e organisadó mas grandi di kompetensia internashonal di freediving ku su reglanan i instrukshonnan. Nan mishon ta pa mustra mundu ku e deporte akí ta seif, plasentero i desafiante i alabes un meskla fantástiko di trankilidat interno, konsentrashon i trabou den tim. Nos isla ta implementá algun protokòl pa salbaguardá siguridat máksimo durante e intentonan, ku medidanan manera un sistema di kontra-balaster i un ambulans ku ta ‘stand by’, pa garantisá e mihó ambiente posibel pa e intentonan akí.
