Manera tur elekshon den pasado e aña aki lo bai tin un grupo ku lo ta bai vota pa promé biaha. Dikon esaki ta importante? Esaki ta importante paso nan tambe tin derecho pa vota i duna nan opinion tokante polítika. Hopi di e desishonnan ku tuma awe lo tin efekto riba e hóben nan aki ku aki 4 pa 5 aña ta kaba studia. Nan opinion tambe ta konta.
Dos elekshon pasa p’ami tambe ta promé biaha ku ami tabata por a vota. Esaki tabata algu interesante i diferente.
Mi tabata kana ku sierto pregunta nan:
- Mi opinion ta konta?
- Ora nan skucha mi esaki di bèrdat lo wòrdu tuma na serio?
- Di bèrdat nan ta pensa riba mi? Òf ta mi voto so nan ke?
- Unda mi por haña informashonnan relevante pa yuda mi hasi e mihó eskoho pa ken mi te vota?
E preguntanan aki ta demostrá e insiguridat i interes den e tópiko aki. Ta lamentabel di mira ku kada 4 aña so ta kòrda riba e grupo di hóben aki.
Ta bisa ku hóben ta importante i ku nan opinion ta konta. Remarkabel ta ku kada biaha ku un hóben duna su opinion públikamente ta bisé ku e ta muchu jong òf tin muchu tiki eksperensia pa duna su opinion. E ora ei e pregunta ta bini: bèrdat nan opinion ta konta i ta wòrdu respetá?
E echo ku e hóbennan no ta wòrdu tuma na serio i respetá ta pone ku den transkurso di añanan e hóben a pèrdè interes den polítika.
M21 ta para pa partisipashon di hóbennan (jongerenparticipatie). Mester krea un sistema kaminda e hóben por duna nan opinion i pensa huntu ku nos polítiko nan. Esaki ta algu ku mester pasa struktural i no un biaha so i despues te elekshon atrobe. Aktualmente M21 tin hóbennan kapasitá riba lista ku mester bira e relevo pa futuro. Nan a disidí di duna nan aporte pa asina yuda trese solushonnan pa nan i nan futuro generashon.
Tambe mester prepará e hóbennan aki for di un edat mas jong pa nan sa ta kiko polítika ta enserá i kon e ta hinka den otro. P.e. na skol mester hinka algun lès di nos diferente órganonan i funshonnan polítiko pa nos hendenan nan por komprondé importansia di demokrasia, elekshon i representashon polítiko. Pa ora nan yega na e edat pa vota nan ta prepará i nan tin e tools nan nesesario pa hasi un eskoho konsiente.
Semper nos ta bisa ta e hóben ta nos futuro. Laga nos ban balorá, apresiá i respetá e hóbennan manera debe ser. No ku palabra so pero tambe ku akshon.