Diamars a tuma lugar un encuentro den sala di Parlamento cu instructornan di landamento tocante e intencion di e maneho di landamento di Minister di Enseñansa. E reunion aki a wordo yama door di Alan Howell como vice Presidente di Parlamento y el a presidi esaki tambe.
Howell ta considera e reunion aki sumamente importante y ya for di ora a trata e presupuesto supletorio el a haci diferente pregunta skerpi na Minister di Enseñansa riba e tema aki.
Asina e Vice Presidente di Parlamento a yama e openbare bijeenkomst aki pa invita e comision di e instructornan di landamento y asina nan por sinti tambe cu Parlamento ta compronde nan dolor y cu nan ta importante.
“Hopi biaha nos ta mira cu den pasado otro gobernacion tabatin otro forma pa atende e tipo di reunionnan aki, pero mi ta kere den un Parlamento responsabel, cual ta importante pa por scucha tur partido y duna e ciudadano e oportunidad pa por drenta den su cas y trece su preocupacion dilanti”, Howell ta declara.
E ta sigui bisa cu e reunon tabata uno exitoso y mas important eta cu e comision di instructornan di landamento a haya tur oportunidad yden tur trankilidad pa trece nan preocupacionnan dilanti. Segun Alan Howell, dos preocupacion grandi cu nan a trece dilanti ta e vision cu e minister di Enseñansa kier bin cune pa loke tat rata cuminsa duna muchanan di kleuter zwemles, cual riba su mes ta zona un vision bunita, pero realidad ta cu e instructornan di landamento ta bisa cu e ta algo hopi dificil mirando cu e muchanan ta chikito, cu nan no por cambia nan mesun paña, ta bay tin mester di hopi mas instructurnan di landamento pa brinda e parti di siguridad pa nada robes pasa cu e muchanan aki.
E otro preocupacion ta relaciona cu e parti laboral. Nan tin riba nan payslip cu dia 31 di december nan trabou ta bay termina, es decir, no lo tin mas trabou pa nan. “Pami personalmente esaki ta inaceptabel. Mi ta kere cu mirando e situacion cu nos pais ta aden, e crisis cu nos pais ta aden, nos no mester di mas ciudadano cu no ta confortabel, cu ta preocupa sit a bay tin trabou ora aña habri. Mi ta kere ta na Parlamento tambe pa para tras di e instructornan di landamento aki pa por trece un siguridad pa nan, cu nan 28 aña, nan 15 aña, nan 20 aña no a bay gewoon perdi. Esey ta imposibel y inaceptabel. Awe den Parlamento nos a sinti cu nan a sinti cu Parlamento ta para nan tras. Hasta na final por a scucha cu Sr. Ricardo Croes a duna un ñapa cu lo tin bon noticia den direccion di e instructornan di landamento”, Alan Howell a indica.
El a conclui bisando cu pe tabata un placer di por a presidi e reunion aki y scucha e instructornan uit nan mes, bin cu nan preocupacion y nan frustracion dilanti, pasobra nos mester di e instructornan di landamento aki pa ta bon concentra den nan trabou pasobra nan ta atendiendo cu nos yiunan chikito, cu bida humano y pa nan sigui haci nan trabou cu e mesun amor cu nan a bin ta haciendo esaki pa tanto aña caba. “Nos no tin ningun duda den esey, nan tin 28 aña den e ‘business’ aki y nos mester dunanan e respet pa loke ta esaki. Si tin un vision nobo di parti di minister, importante ta pa e por sinta cu esnan cu ta den e veld, haya conseho di nan y hinca un producto bunita den otro di cual nos tur por ta trankil cune y mas importante ainda, cu e ta sigur pa nos muchanan”.
