A pesar di e pandemia di Covid-19 e proyecto hotelero di Secret’s (na San Nicolas) ta canando riba un bon ritmo. Lider di POR tabata na San Nicolas a bay personalmente na Sero Colorado y a constata cu tin movecion di trahadonan.
Ta trata di un hotel di 5 strea cu lo tuma algun aña di construccion pero cu tur cos ta indica cu e lo finalisa riba e fecha programa. E ta un proyecto cu POR ta kere den dje y algo cu lo bira realidad pa Aruba y principalmente pa pariba di brug. “Nos ta orguyoso di loke nos a bin ta mira aki, pasobra hopi hende no por kere of mira San Nicolas desaroya.”
El a recorda un reunion publico cu el a pidi riba desaroyo di San Nicolas y masha poco politico a contribui cu algo positivo den e reunion en cuestion. Pero awo cu ta eleccion, hopi politico tin storia bunita pa San Nicolas. Awo di repente ta papia cu San Nicolas mester di su prioridad. “Tempo cu Alan Howell tabata lucha y bringa tras di e hendenan di San Nicolas, pero niun hende a para band’i mi. Mi lo sigui traha duro pa San Nicolas pasobra partido POR ta kere den San Nicolas.”
Cu POR den Gobierno lo percura pa e Fast Ferry bira un realidad, pone un parke pa grandinan banda di EPB SN y e muchanan chikito. Lo enfoca pa trece filial di departamentonan di gobierno den centro di San Nicolas pa trece un desaroyo economico.
El a recorda con el a persisti pa Biblioteca habri bek den e bario pariba y esey a sosode. Mescos a sosode cu AZV unda cu a persisti cu e servicionan aki mester sigui na e parti pariba.
Cu hopi ansiedad e ta spera e forum di San Nicolas Business Association, pasobra sigur lo bay mira e politiconan bini cu tur tipo di vision y plan bunita pa esnan di pariba di brug vota pa nan, pero “en realidad nan no tin e hendenan di pariba na pecho. Nan no mester solamente vision y plan, pero mester di un figura politico cu ta para tras di e hendenan humilde di pariba. Mi a reconoce e falta di atencion di pariba. E ta keda haci dolor cu cada cuatro aña, nan ta kere cu nan por bini pariba y gaña hende cu placa y cuminda keriendo cu por gaña nan. Nos ta sigur cu e eleccion aki lo trece un sorpresa pasobra e hendenan kier un diferencia.”
Stranhero
Pa loke ta e tema di stranheronan, el a bisa cu den pasado a trece hopi hende di pafo. E motibo ta cu e Arubianonan no tabata interesa den cierto tipo di trabou duro manera den housekeeping. Pero mirando e desempleo cu tin aworaki probablemente Arubianonan lo yena tur e cuponan di trabou. “Pesey e hotel aki ta importante, pasobra e lo yuda economia di henter pais Aruba, ya cu e lo por trece otro tipo di negoshi pariba y restaurantnan di calidad den e area pariba. E hendenan por scoge pa traha na San Nicolas, cu ta haci cu nan por uza nan tempo den forma mas eficiente. Esaki ta un situacion cu tur hende por gana cu ne.”
Banda di esaki tin stranhero bibando na Aruba cu tambe por haci uzo di e oportunidadnan aki, si nan ta bibando legalmente na Aruba.
E proyecto lo mester cla denter di cuatro aña.