A falsifiká dokumento?
kusashonnan fuerte di parti dr. mr. Anthony Nicolaas ta pone Rijksdienst Caribisch Nederland (RCN) den un lus sumamente negativo. Praktikamente ta tilda RCN no solamente di ta mal dunadó di trabou pero alabes sin eskrupulo ta usa medidanan kuestionabel pa perhudiká un ámtenar.
E esensia di e akusashon ta básikamente ku RCN a kometé froude pa asina hustifiká retiro di un ámtenar. Di parti RCN kategorikamente ta desmentí e akusashon aki. E situashon aki a bini den publisidat na momentu ku djabièrnè 17 di novèmber 2023 a trata apelashon den e kaso di derecho di ámtenar.
Gwendolyn C. i su abogado dr. mr. Nicolaas a trese nan punto di bista dilanti, den kua nan ta persistí ku RCN a kometé froude. Remarkabel den e kaso aki ta ku alabes nan ta tilda e abogado di RCN di kondukta deshonesto.
E abogado di e kontrapartido ta mr. Tessa Bruegom. “Ta bin ku insinuashonnan pa krea un kortina di huma. Nan ta malusá e derecho di hiba un proseso. Mi no ta ni reakshoná riba e akusashonnan kontra mi persona”, mr. Bruegom ta bisa.
Ofisialmente e kaso aki ta C. kontra Minister di Asuntunan Interno i Relashon den Reino. ‘Raad’ a trata e apelashon.
E situashon
Resumiendo henter e situashon, ta trata aki di e desishon di minister pa kita un kolaboradó di Kmar for di trabou pa motibu di malesa duradero. E empleado a entamá un kaso den korte kontra e desishon aki. Hues di Korte den Promé Instansia a konstatá básikamente ku no tabatin dokumentonan pa motivá e ponensia di malesa duradero, pues a duna RCN e chèns pa trese rapòrt di e dòkter di seguro pa sostené e retiro. RCN na su turno a duna Medwork e tarea pa eksaminá C.
Aki ta surgi e diskrepansia, mirando ku final di e proseso a resultá den 2 rapòrt. Dr.mr. Nicolaas tabata presente durante eksaminashon di su kliente, i ta deklará ku e dòkter di seguro a kùr C., pues e ta bon i no por papia di malesa duradero. Sinembargo e rapòrtnan entregá pa RCN ta bisa ta hustamente ku C. no a kùr bon i firmá pa mesun dòkter.
“Dòkter Ramzan ta insistí ku e no a firma e rapòrt ei. Medwork a usa su firma digital”, segun dr. mr. Nicolaas. E abogado a presentá ku un testigu dispuesto deklará ku e dòkter a bis’e ku nunka el a traha òf firma e rapòrt. Tambe C. mes tin vários mensahe di whasapp di e dòkter ku ta ninga di a traha i firma e rapòrt.
Banda di tur esaki e demandante a tilda abogado mr. Bruegom di a menasá e dòkter di seguro pa bin ku un rapòrt negativo, sino RCN lo stòp kontrato ku Medwork. Tambe ku mr. Bruegom a bai den su dosié médiko lokual ta kontra lei di privasidat. Un punto remarkabel ta ku dòkter Ramzan a tuma retiro di Medwork i a muda pa Hulanda.
Duda pa ku Medwork Abogado mr. Bruegom a splika ku Medwork tabatin tarea pa determiná di C. ta inkapasitá pa traha permanentemente. Un temporada a pasa sin kontakto ku Medwork. “Na momentu e deadline tabata serka mi a tuma kontakto ku Medwork. Nan a bisa C. no ta sintié bon ku Medwork. Mi a bisa ku mi ta spera profesionalidat di nan banda I ku nan mester reportá. Nunka mi a menasa.”
Tambe el a splika ku dòkter Rampshan a atendé e kaso i dado momentu e no tabata disponibel pues su kolega a firma e promé rapòrt. Si Medwork a usa firma digital di dòkter Ramzan, e komo abogado no ta na altura. “Ku ta firma digital òf nò, ami no sa. Mi tabatin kontakto ku ámbos dòkter. Ta trese awor akusashonnan hopi pisá. Mester bin ku mas kos i no solamente insinuashon”, mr. Bruegom ta bisa.
Kiko ta e bèrdat?
Remarkabel den e kaso aki ta e echo ku no a pone énfasis pa yega na e bèrdat. Raad a ninga di skucha e testigu ku dr. mr. Nicolaas a trese. “Nos no ta skucha e testigu. E no ta trese sufisiente peso den e balansa”, presidente di Raad ta bisa.
Konsekuentemente dr. mr. Nicolaas a pidi pa skucha dòkter Ramzan mes komo testigu. “Bo mester a hasi e petishon promé”, mr. Bruegom mesora ta reakshoná. Presidente di Raad a konfirmá ku ta muchu lat pa e dòkter testiguá. Básikamente esaki ta nifiká ku e bèrdat no ta sali na kla.
Raad ta tuma un desishon den e kaso aki riba 17 di yanüari 2024.