Awe a firma e akuerdo intergubernamental pa idioma papiamentu na Boneiru entre Minister Kajsa Ollongren di Asuntunan Interno i Relashon den Reino (BZK) i Diputado Nina den Heyer di Entidat Públiko Boneiru (OLB). Minister Ollongren a hasi esaki tambe na nòmber di Minister Ingrid van Engelshoven (Enseñansa, Kultura i Siensia), Arie Slob (Enseñansa Básiko i Sekundario) i Sekretario di Estado Raymond Knops di BZK.
Papiamentu ta e idioma original na Boneiru. Pasobra na Boneiru ta papia mas i mas idioma, protekshon di papiamentu ta di gran importansia. E kombersashonnan tokante esaki ku a hiba entre Reino, OLB, Fundashon SPLIKA i Fundashon Akademia Papiamentu, a kondusí na e akuerdo intergubernamental aki.
Tur esnan embolbí di e forma aki ke protehá i promové papiamentu na Boneiru. Pa e generashon di papiadó aktual i den futuro. Pa logra esaki, a papia di diferente ambishon pa entre otro registrá nivel di papiamentu i pa garantisá ku no solamente ta papia e idioma, pero ku hende ku ta kaba skol tambe por lesa i skibi e idioma. Den e akuerdo intergubernamental tambe a palabrá ku e partidonan lo investigá lantamentu di un organisashon konhunto. E organisashon aki mester empeñá pa preservashon i desaroyo mas aleu di e idioma papiamentu, tambe e kultura ku ta mará na e idioma papiamentu. Pa esaki ta buska kontakto tambe ku e paisnan Aruba i Kòrsou, kaminda tambe ta papia papiamentu.
Minister Ollongren: “Idioma ta importante pa nos tur. E ta yuda hasi nos ken nos ta. Nos idioma tambe ta hasi nos parti di un sierto pais òf un sierto grupo. Papiamentu ta bou di preshon di e otro idiomanan na Boneiru. P’esei e akuerdo aki ta importante. E ta forma un komplemento importante pa legislashon eksistente.”
Diputado Den Heyer: “E idioma papiamentu ta un parti importante di e herensia kultural di Boneiru, pasobra e historia, kultura i identidat riku di Boneiru akiden ta archivá i ta sigui desaroyá mas aleu.
Na Boneiru ta papia vários idioma, pero papiamentu ta sigui e idioma ku ta uni tur grupo di poblashon ku otro. Ta un momentu memorabel den historia di Boneiru.”
Pa perkurá pa ehekushon bèrdadero di tur e ambishonnan efektivamente ta realisá i pa vigilá progreso di esaki, partidonan ta konsultá regularmente. E akuerdo intergubernamental no ta algu riba su mes. Pasobra OLB i e organisashonnan di interes, Fundashon SPLIKA i Fundashon Akademia Papiamentu, tin e deseo pa tambe rekonosé papiamentu bou di e Pakto Oropeo pa idioma regional òf idioma di minor. E Minister tambe ke investigá esaki konhuntamente.
1 comment