Resientemente MAN PIN a tuma nota di e akuerdo entre Refineria di Kòrsou(RdK) i PDVSA pa loke ta debe atrasá. Primeramente nos ta aploudi ku a yega na kumplimentu pa loke ta debenan atrasá na RdK, èks empleadonan i penshonado.
E akuerdo aki ta basa riba un claim ku RdK for di 2020 a entrega kontra PDVSA na arbitrahe mirando kondishon atrasá ku a bai laga atras despues ku e kontrato ku PDVSA a vense na desèmber 2019. Banda di esei PDVSA a laga debe na e trahadonan kual RdK a pre-finansia esaki i di e forma aki e trahadonan por a mantene kabes riba awa.
Despues di un proseso den arbitrahe kual a terminá na mesa den un akuerdo entre RdK i PDVSA nos por konkluí ku e claim di mantenshon atrasá na instalashon di nos refineria tabata na su lugá. MAN PIN ta kontentu ku pueblo di Kòrsou por risibí loke ta koresponde na dje.
Den un karta ku nos ta dirigi na Gobièrno komo akshonista 100% di RdK, nos ta hasi pregunta riba destinashon di e fondonan ku ta bini pa RdK.
E pregunta karnidal pa nos ta ku RdK lo invertí e fondonan den mehorashon di instalashon i invershon den e parti di medio ambiente manera e intenshon tabata na inisio ku a claim PDSVA. Minister Presidente a splika ku RDK lo risibí un pago di PDVSA den krudo durante un periodo di 10 aña. Nos kier mira e kontrakto i haña aklarashon kon RDK a determiná e suma di $ 45 mion pa aña. Kon lo kalkulá e kantidat i balor di e produkto anualmente, mirando ku no ta un sekreto ku preis di krudo ta kambia pa dia i ku e esaki por ta impaktante pa e kantidat di krudo ku lo entregá Kòrsou. MAN PIN ta deseá pa sigur Parlamento risibi informashon riba e akuerdo i tambe tuma nota di e kontenido.
MAN PIN semper a para pa kontinuashon di operashon di nos refineria den un medio ambiente limpi i salú.
Sinembargo MAN PIN ta di opinion ku si no tin ningun garantia ku ta keda kla ku un operador nobo pa nos refinería ta bon pa Gerensia, Hunta di Komisario i Akshonista konsiderá pa hinka e fondonan ku ta bai risibí den un Fondo di Invershon Ekonómiko General kual por keda usa pa desaroyo di nos ekonomia inkluso invershon den refineria i otro proyekto nan riba tereno di Emmastad i Bullenbaai.
Al final nos kier felisitá gerensia di RdK tantu e direktor anterior sr. de Lanoy kual a sòru hasi kalkulashon di e mantenshon atrasá pero tambe sr. Newton i akshonista(Gobièrnu di Kòrsou) kual a sigui ku e proseso pa yega na loke ta koresponde na pueblo.
