Partido Movementu Alsa Nashon (MAN) i Partido Inovashon Nashonal (PIN)
konhuntamente indiká komo “partidonan”;
Konsiderando ku:
partidonan su filosofia polítiko, siendo e filosofia sosial- demókrata di MAN i humanista kristian di PIN pa un parti hopi supstanshal ta konkordante i di ningun
manera ta den konflikto filosófiko ku otro;
partidonan tin komo meta prinsipal pa partisipá na elekshonnan liber i demokrátiko pa asina optene representashon den parlamento i hasi tur lokual ta nan nan alkanse pa realisá bienestar i progreso duradero den tur area pa tur hende na Kòrsou i fortifiká asina nos nashon;
partidonan a konstatá un fragmentashon grandi den arena polítiko na Kórsou, ku no ta na benefisio di desaroyo di polítika i por mina desaroyo duradero di pais;
partidonan, despues di un analisis i interkambio profundo, a konkluí ku kada un riba su mes i konhunto tin e konosementu, eksperiensha, abilidatnan i aktitut polítiko pa inová i alsa nos nashon pa yega na bienestar amplio i desaroyo duradero di Kòrsou;
Kòrsou ta konfrontá ku retonan sensibel pa su desaroyo emansipatorio i sosio- ekonómiko, ku ta eksigí un union di vishon, forsa di akshon, inovashon i inklushon di tur sektor pa por atendé e retonan aki;
e respektivo organonan statutario di ambos partido pa aklamashon a aprobá un koperashon duradero entre partidonan;
Ta kumbiní lo siguiente:
1. Partidonan ta drenta den koperashon mutuo pa, aplikando e derechinan demokrátiko ankrá den nos konstitushon, partisipá ku un lista konhunto na e próksimo elekshon pa parlamento di Kòrsou i propagá un vishon polítiko komun riba tur area di gobernashon.
2. Partidonan ta desaroyá un proseso pa yega na un lista balansá representativo di tur gremio prinsipal di komunidat, konsistiendo di kandidatonan ku ta kumpli ku e eksigenshanan di konfiabilidat i integridat, segun un repartishon ekitativo ku base resultado di e ultimo elekshon, posishon aktual den ambito polítiko i ku referensha na artíkulo 3 di e konbenio aki.
3. E lider polítiko aktual di partido MAN lo keda postulá komo kabesante di e lista
konhunto. E lider polítiko aktual di partido PIN lo keda postulá komo number dos riba e lista konhunto. Partido MAN lo okupá 17 i partido PIN 12 di e posishonnan riba lista,
segun e anekso na e kombenio aki. Kada partido lo proponé e kandidatonan pa subi lista na momentu debido.
4. Partidonan a instituí un komishon di maneho, konsistiendo di lider polítiko di ambos partido, presidente o vise-presidente di ambos partido i un representante di kada partido komo sekretariado.
5. E komishon di maneho tin komo tarea:
a. vigilá desaroyonan polítiko, konsultá riba puntonan di bista riba temanan polítiko regularmente, fiha posishon konhunto riba temanan polítiko i hasi tur esfuerso pa realisá ekspreshonnan públiko di punto di bista riba temanan polítiko den un
forma konsistente i kongruente;
b. mantené i regularmente aktualisá e lista di temanan polítiko den anekso di e kombenio aki;
c. vigilá progreso di trabounan preparatorio pa partipashon na elekshon i
d. funshoná komo arbitro na momentu ku surgi un konflikto entre miembro di partidonan.
6. Komishon di maneho ta kordiná tur aspekto organisatorio relashoná ku e koperashon entre partidonan i ta institui riba termino korto komishonnan di trabou konhunto pa por lo menos e siguiente aktividatnan:
a. Determiná un estilo di kas (huisstijl) komun;
b. Desaroyo i formulashon di un konsepto di strategia di mas aña i programa
elektoral konhunto;
c. Planifikashon di aktividatnan konhunto pa rekouda fondo;
d. Planifikashon i ehekushon di aktividatnan konhunto pa formashon polítiko di
potenshal kandidatonan pa lista;
e. Desaroyo i formulashon di un konsepto di plan pa kampaña elektoral.
7. Partidonan ta hasi tur lokual ta nesesario pa evitá ku imahen polítiko públiko di partidonan ta keda dañá.
8. Partidonan lo informá otro sin retraso den kaso ku un otro partido polítiko o polítiko aktivo ku a partisipá na e elekshon di mart 2021 aserká ku e meta pa forma parti di e lista konhunto di partidonan. Partidonan lo disidí konhunto riba e aserkamentu di un
terser partido o polítiko aktivo, ku konsiderashon na e akuerdonan den e kombenio aki
9. Partidonan ta akordá di nò ekskluí formashon di un gobièrnu ku ningun partido di kua su filosofia polítiko ta kongruente ku partidonan, i, ku despues di elekshon den kua partidonan optené asiento den parlamento, ta partisipá konhunto na rondanan di informashon i formashon pa yega na un gobièrnu.
10. E kombenio aki a drenta na vigor dia 11 di novèmber 2023 i ta pa tempu indefiní. Partidonan na kada momentu por terminá e kombenio aki ku un periodo di notifikashon di un aña, sin kita e derechi legal di kada partido pa disolve e konbenio.
