Akshon konhunto di Wardakosta i Zr.Ms. Holland riba laman 12 persona detené ku 1325 kg droga a bordo di un ‘go-fast’

Ayera den un akshon konhunto riba laman, kaminda unidatnan di Wardakosta i Zr.Ms.  Holland, ku tabata envolví den nabegashon pa Wardakosta, un ‘go-fast’ a keda interseptá  ku gran kantidat di droga riba laman. 

Despues ku djaweps sensornan di Wardakost a detektá un ‘go-fast’, e avion Dash di  Wardakosta a keda desplegá. E ‘go-fast’ a nabega sùit di Kòrsou pasa ku posiblemente  paketenan ku kontrabanda a bordo. E Sentro di Reskate i Kordinashon (RCC) di Wardakosta a  dirigí e barku di patruya Zr.Ms. Holland direkshon di e ‘go-fast’. E barku di patruya a dirigí su  helikòpter di bordo, e NH-90 i un FRISC, den direkshon di e ‘go-fast’ pa interseptá esaki. No  opstante varios tiru di atvertensha di e helikòpter NH-90 pa e pasaheronan di e ‘go-fast’ pa stòp  nan boto, esakinan no a duna oido. Finalmente e NH-90 a pasa over pa deskontinuá e  motornan di e ‘go-fast’ pa medio di uso di asina yamá ‘disabling fire’, tirunan pa desabilitá e  motornan. E FRISC, e nave di interesepshon rápido di e barku di Marina Real Zr.Ms. Holland a  keda desplegá pa buska e pasaheronan di e ‘go-fast’ ku tabata sink i pa saka e paketenan for di  den laman.  

A bordo di e ‘go-fast’ tabatin 12 pasahero Venesolano i en total 45 pakete, konsistiendo di 1050  kg kokaina i 275 kg marihuana, ku a keda saká for di den laman. E sospechosonan i e  paketenan ku e FRISC i Metal Sharks a keda traslada pa e embarkadero di Wardakosta na  Parera, kaminda tantu e sospechosonan komo e paketenan a keda entregá na Kuerpo Polisial. 

Durante e akshon un di e personanan riba e boto go-fast a keda herida. E persona aki a ser  hibá via helikòpter pa hospital na Kòrsou pa haña trato médiko.