Movementu Kousa Promé a proklama aña 2021 komo aña di Patrotismo. Den e kuadro aki su ala di formashon emansipatorio “Akademia Popular Errol Scoop” ta ranka sali ku un siklo nobo titulá: “Patriotismo, un wes’i lomba pa e yu di Kòrsou Nobo”.
Kousa Promé semper a deklará ku e ta para pa un Kòrsou liber i outónomo den mundu. Ta pueblo ta determiná e ruta i velosidat ku tin ku hiba nos na e soberanía aki. Sinembargo ta masha disfísil pa un pueblo kanalisá su desaroyo si e no ta sufisientemente formá pa hasi esaki. Kousa Promé ta konvensí ku nos mester traha pa yega na un yu di Kòrsou nobo ku orguyo i balor propio. Un yu di Korsou ku ta kere den su mes i ku ta kere ku huntu nos por hiba Kòrsou dilanti. Un yu di Kòrsou patriótiko ku ta stima su próhimo i su pais. Un yu di Kòrsou, ku un inmenso amor pa Korsou i ku ta dispuesto pa hasi sakrifisio pa hiba su pais dilanti.
Pero e amor profundo ei pa pais nos no ta nanse kuné. Ta un amor ku mester kultivá serka kada un suidadano for di su nasementu. Tur hende tin e deber sagrado di duna un man den e proseso di kultivashon di e enorme amor aki pa pais Kòrsou.
Kousa Promé ta konvensi ku un dia Kòrsou lo ta pará riba su mes pia. E yunan di Korsou nobo tin ku yuda den esaki. Kousa Promé ta dispuesto pa kontribuí pa yuda forma e yu di Kòrsou nobo aki. P’esei durante un periodo di 12 siman kuminsando 30 di ougùstès próksimo Akademia Popular Errol Scoop ta start ku un siklo riba Patriotismo.
Pa e siklo aki nos a skohe dosentenan ku tin e kompetensia pero tambe dosentenan patriótiko ku amor pa patria ku den nan akshonnan e sentido patriótiko ta resaltá.
E temanan relashoná ku patriotismo ta hopi variá i profundo. Den e siklo aki ta trata siguiente temanan:
1
30 di ougùstùs dr. René Rosalia Un splikashon detayá di e konseptonan Patria, patrimonio i patriotismo.
06 di sèptèmber Indira Boelbaai Kon implementá edukashon patriótiko i unidat nashonal den skol di fundeshi. E ròl sentral di enseñansa pa implementá patriotismo den pueblo. Kon patriotisá un pueblo, kondishonnan pa implementashon di patriotismo eksitosamente den skol di fundeshi i e ròl di dosentenan den esaki?
13 di sèptèmber Janette Pablo Patriotismo i maneho di bario. Akshonnan den bario ku por kontribuí na desaroyo di sintimentu patriótiko i amor pa bario i alabes amor pa patria. Kua ta e elementonan importante pa konstruí un pueblo i un kultura nashonal? Ròl di bario den e proseso di “nation building”?
20 di sèptèmber Trevor Bakhuis Patriotismo i konosementu di historia. E importansia di konosé e patriotanan ku a entregá nan bida pa país. Importansia di historia den desaroyo di patriotismo.
26 di sèptèmber (djadumingu: Ekskurshon) Eurlyson Naar Ekskurshon patriótiko den área di Groot St. Martha, Klein St. Martha i Soto pa sera konosí ku algun presiosidat di nos patrimonio natural di Bándabou. Tesoronan skondi manera entre otro pos di Fle, pos di pia, dam di koko, ser’i warawara èts.
27 di sèptèmber Glenn Thomas Presensia di patriotismo na televishon i radio na Kòrsou. Kon e situashon di nos radio i televishon ta awor aki. Ta eksisti e afán pa establesé un konsiensia nashonal na Kòrsou? Por rekonosé presensia di patriotismo den prensa en general na Kòrsou? Ta eksistí sufisiente esfuerso i lucha pa krea konsiensia patriótiko den e aktual programashonnan di radio, televishon, korant i medionan sosial aki na Kòrsou?
4 di òktober Max Elstak Formanan represivo ku podernan kolonial a uza den historia pa eliminá lidernan patriótiko i pa evitá kresementu di patriotismo den nan kolonia
2
11 di òktober Marlon Regales Atenshon na algun érue i baluarte di Kòrsou i e influensia ku nan a laga atrás komo patriota. Ehèmpelnan manera Tula, Pedro Luis Brion, Carlos Manuel Piar. Tambe baluartenan manera Felis Chacuto, Papa Godet, Amador Nita, Amado Römer, Sergio Coco, Frank Martinus Arion, Joceline Clemencia, dr. Frumencio da Costa Gomez, Eugene Godfried, Richard Hooi, Elis Juliana,
17 di òktober (djadumingu: Ekskurshon) Harry Moen Un rekorido musikal patriótiko den kurason di Otrobanda. Artistanan di Kòrsou di ayera ku a kontribuí na nos patrimonio musikal?
18 di òktober Ernesto Rafaēl Vos Kua ta e vishon aktual di e maneho di turismo na Kòrsou?
Mester di un vishon progresivo nobo pa un maneho di turismo patriótiko pa Kòrsou. Kon pa yega na esaki? Maneho patriótiko lo por generá divisa pa Kòrsou? Un maneho patriótiko di turismo lo pone Kòrsou kai for di interés di gigantenan turístiko internashonal europeo i merikano? Of ta nèt kontrali?
25 di òktober Lloyd Narain Patriotismo lo yuda salbaguardiá presensia efektivo i rèspèt pa EOP? Patriotismo lo yuda salba nos parkenan natural di palu di mangel? Gobernante, ámtenar i siudadanonan patriótiko lo yuda stòp dèmpelmentu ilegal na Korsou? Patriotismo lo sòru pa playanan di Kòrsou habri pa yunan di tera piska, landa i rekreá sin estorbo i restrikshon aki na Kòrsou?
01 di novèmber Hubert Scherptong Kon yega na un vishon nobo pa un maneho progresivo patriótiko pa ekonomia di Kòrsou. Kua ta e aspektonan ekonómiko prinsipal ku mester haña atenshon pa yuda promové e sentido di patriotismo (orguyo propio) di e yu di Kòrsou? Un maneho patriótiko pa ekonomia lo empobresé Kòrsou òf lo e halsa Kòrsou? Otronan ku no ta yu di Kòrsou lo por hiba un maneho ekonómiko patriótiko na fabor di Kòrsou?
08 novèmber 2021 Jeanne Henriquez Patriotismo ku un enfoke internashonal. Relashon di e diferente revolushonnan patriótiko i nan posibel influensia riba Kòrsou p.e. revolushon franses, patriotismo kubano, venezolano i patriotismo di Toussaint L’Ouverture (Haiti). Ki balor nan tin òf mester tin pa Kòrsou?
3
12 di november 2021 Gruponan Nochi di baluarte
– Ku presentashon di e diferente gruponan formá pa kursistanan. Nan ta presentá resultado di nan investigashon riba un baluarte di Kòrsou. Nan ta presentá nan análisis pa proba ku e persona ku nan a skohe realmente ta un baluarte.
– Kousa Promé ku homenahe na un baluarte di Kòrsou ku ta Jeanne Henriquez – Entrega di sertifikado
– Brindis
– Klousura di siklo
E lèsnan ta konsistí pues di un parti teorétiko, dos ekskurshon pa sera konosí ku algun patrimonio kultural i natural importante di Kòrsou. Pa sostené e formashon ku akshon konkreto, e partisipantenan, uni den grupo di trabou, ta haña un tarea di investigashon kaminda nan mester buska, studia i presentá un baluarte yu di Kòrsou di nan eskoho.
E lèsnan ta tuma lugá tur djaluna dia 30 di ougustus na Sentro di Bario Santa Maria. Orario di lès ta dos ora i mei di mitar di shete pa nueb’or di anochi. Akademia Popular Errol Scoop ta informá ku e lèsnan ta grátis. Inskripshon ta kosta 35 florin. Pa por realisá e dos eskurshonnan partisipantenan mester kontribuí pa kubri e gastunan enbolbí .
Sekretariado di Akademia Popular Errol Scoop ta invitá tur esnan ku ta interesá pa inskribí pa e siklo importante aki. Por inskribi na number di telefòn 667.21.78 i 513.80.50
Akademia Popular Errol Scoop e ala di formashon emansipatorio di Movementu Polítiko Kousa Promé ku ta bou di liderato di mr. dr. Rene Rosalia.
1 comment
[…] Source link […]