Movementu Kousa Promé a proklamá aña 2022 komo “Aña di Emansipashon”. Den e kuadro aki su ala di formashon: “Akademia Popular Errol Scoop” ta ranka sali ku un siklo nobo titulá:
“EMANSIPASHON”
Den e siklo aki ta kontesta dos pregunta sentral:
- Kiko a pasa ku e yu di Kòrsou ku awe den siglo
ainda e no a emansipá?
- Kiko a pasa ku rumannan di eks Antia? Emansipashon a tuma luga?
Movementu Kousa Promé ta konvensí ku tur hende ku ta biba den un pais kolonisa mester ta enbolbí den buskeda di solushon pa problemanan ku ta stroba nan di emansipa. Pero pa por partisipá optimalmente na e desaroyo aki nan mester disponé di konosementu. Nos pueblonan for di nan eksistensia mester por a alkansá un sierto grado supstansial di konsiensia emansipatorio i di patriotismo.
Konsiensia emansipatorio ta ora un persona a forma su mes i desaroyá te ku el a siña konosé su mes, su kultura, su historia, su realidat sosial, ekonómiko i polítiko. Ta ora e yega ku hopi sakrifisio asina leu di ta dispuesto i disididu pa sali dilanti pa su mes i pa su pais. Den e kaso spesifiko di Korsou ta ora lucha i yega na e nivel di un yu di Kòrsou nobo. E yu di Kòrsou kombativo i patriota ku tin orguyo propio i ku ta kere den su mes i den su pais.
Meta di e siklo:
Meta di Siklo Emansipashon ta promove e proseso di formashon emansipatorio. Alabes promove e lucha antikolonial di dekolonisashon. Bringa e krisis di identidat i promove unión entre pueblonan di eks-Antia.
Ta p’esei Kousa Promé ta para riba ku pueblo di Kòrsou mester emansipá i eksiguí rèspèt pa su outonomia.
Durante un periodo di 12 siman, kuminsando 19 di aprel te ku 26 di yüni próksimo, Akademia Popular Errol Scoop ta start ku su siklo riba Emansipashon.
E siklo ta konsistí di dos blòk
Den blòk A ta trata temanan manera kiko ta emansipashon; e bèrdat di emansipashon; blòkeo legal, kultural i religioso kontra emansipashon di e yu di Korsou. Lo trata tambe resultado di blokeo legal, kultural, politiko, hurídiko i ekonómiko riba e yu di Kòrsou. Kiko ta e ròl di edukashon i formashon den e proseso di emansipashon? Algun konsepto importante ku lo trata den e kuadro aki ta : e konseptonan yu-di-Kòrsou i “yu-di-Kòrsou nobo” i diversidat kurasoleño. E parti aki di e siklo lo kontestá e pregunta: Kiko a pasa ku e yu di Kòrsou ku awe den siglo 21 ainda e no a emansipá? E yu di Kòrsou di siglo 21 ta riba e ruta di emansipashon?
Dosentenan pa Blok A ta: Prof. Dr. Rose Mary Allen, mr. dr. René Rosalia, drs. Ellen Maduro-Jeandor i drs. Jeanne Heriquez MSc,
Den blòk B ta trata e proseso di emansipashon na e islanan BES i na St.
Maarten.
Sint Eustatius: 4 aña despues di e gòlpi di estado hulandes na febrüari 2018, kon e situashon ta awe na 2022?
Boneiru 12 aña BES kon e situashon ta awe na 2022?
Sint Maarten 12 aña despues, kon e situashon ta awe na 2022? Ta trata kada isla basá riba e pregunta: Kiko a pasa ku rumannan di eks Antia? Emansipashon a tuma luga serka nan?
Dosentenan pa Blok B ta: sr. Clyde van Putten di St. Eustatius, sr James Finies di Boneiru i sra Grisha Marten Heyliger di St. Maarten.
E lèsnan ta tuma lugá riba djaluna na Sentro di Bario Santa Maria. Orario di lès ta di mitar di shete pa nueb’or di anochi.
Por sigui e lesnan “live” den sala di Sentro di bario Santa Maria òf virtual sintá na bo kas via di internet.
E 12 lèsnan di e Siklo Emansipashon ta grátis.
Inskripshon ta kosta FL. 50,-
For di 1 di aprel te 19 di aprel por yama e numbernan (+ 5999) 514 5288 i (+ 5999) 513 8050 pa reservá bo lugá den Siklo Emansipashon.
Akademia Popular Errol Scoop ta animá henter pueblo di Kòrsou inkluyendo hóbennan pa inskribí pa e siklo importante aki. Ku e siklo aki Kousa Promé ta brinda konosementu komo un alternativa pa kana yega e proseso di dékolonisashon.
Un pueblo informá ta un pueblo ku defensa.
Enseñansa ta e arma mas poderoso pa kambia e mundu aki