Riba Dia Internashonal di Hende Muhé nos mester aseptá i realisá ku, no opstante di a konosé hendenan muhé den puestonan importante den sektor públiko, den sektor priva i sindikal lamentablemente te ainda e hende muhé no ta haña su lugá.
Esaki ta reflehá den tur nivel den nos pais sin importá nivel sosial òf posishon. Nos ta mira un kantidat di mamanan soltero pasobra te ainda tin hòmbernan ku no ta karga nan responsabilidat komo tata i asumí nan ròl. Esaki ta nifiká ku e muhé mes no ta haña e oportunidat komo hende i komo ser muhé di por desaroyá su mes. E muhénan aki mester buta nan mes na di dos òf di tres lugá pasobra nan mester asumí tur responsabilidat pa na yu(nan) na promé lugá.
Miéntras ta e muhénan aki ta klave pa forma futuro generashon di nos pais i eduká nos hende hòmbernan. Hopi di e hende muhénan sin sosten finansiero , sosial òf emoshonal. Hopi biaha e muhé ta bira víktima di abusu emoshonal i relashonal pa motibunan di dependensia finansiero di un hòmber pa por paga alimentashon di su yunan. E oumento den sifranan di abusu relashonal den nos pais ta papia pa su mes.
Riba nivel laboral tambe e diskriminashon ta presente unda e hende muhé ta gana ménos ku e hòmber pasobra no tin transparensia salarial na Kòrsou. Mester adaptá leynan laboral pa garantisá kresementu di e hende muhé; mas i mihó protekshon pa hende muhé ku keda intimidá na boka di trabou.
Den sektor privá, semi privá i públiko hendenan muhé por haña lugá na mesa i asta na kabes di e mesa pero tòg demasiado biaha ta bagatelisá nan opinion. Un Parlamento di 21 miembro ku apénas 5 di nan ta hende muhé i un gobièrnu ku solamente 1 hende muhé komo minister ta bisa mas ku basta di e posishon di e hende muhé den nos pais. Un pais kaminda mandatarionan ta abusá di nan posishon i ta “bully” hende muhé pasobra nan tin otro opinion, tambe ta bisa hopi.
Awe Dia di Hende Muhé na lugá di selebrá, ban reflehá realmente riba e ròl di hende muhé den nos pais. Na tur e hendenan muhé ku tur dia ta konfrontá e diferente retonan komo e ser femenino òf mama, mi ta enkurashá boso pa eksigí boso lugá i rèspèt sin pidi despensa i no laga esaki dependé di ningun otro hende ku no ta bosnan mes.
Esaki ta e úniko manera ku abo komo hende muhé por sigui desaroyá bo mes komo hende i ser muhé.
