AHATA ta regala ekipo culinario na EPB San Nicolas

Aruba Hotel & Tourism Association ta priorisando sosten na enseñansa y ta invertiendo den preparacion di forsa laboral pa e sector di HORECA cu varios iniciativa. 

Durante un bishita recien na EPB San Nicolas, Presidente y CEO di AHATA, Tisa LaSorte, a keda impresiona cu e facilidadnan na e scol y specialmente e dedicacion di e maestronan, e liderazgo, y e studiantenan. Den combersacion cu Docente Bas Willemsen, y Manager di Unidad Servicio, Sharrity Oduber, por a constata cu e cantidad di studiante den cada klas ta creciendo, pero no tin suficiente ekipo den e cushina pa acomoda e cantidad di studiante. Ademas tabatin ekipo hopi bieu cu mester reemplasa. 

Pa yuda acomoda les culinario mas efectivo y inverti den capacidad di nos hobennan, AHATA a regala e Unidad Servicio varios ekipo pa e aña escolar nobo. Mitad di e donacion tabata entrega e siman aki y ricibi pa Sr. Willemsen, Sra. Oduber, y Director di EPB San Nicolas, Sr. Gregory Mathilda. E resto di e ekipo lo yega aki dos luna pa instalacion den e cushina di EPB na San Nicolas. 

“E sector di HORECA tin necesidad grandi pa talento culinario y AHATA ta priorisando esfuersonan pa reenforsa e preparacion y capacidad di nos futuro cokinan”, Tisa LaSorte a comparti. “E trabao di coki ta rekeri pasion, creatividad, conocemento y un inmenso dedicacion. Cu e donacion aki na e scol, nos kier yuda inspira e hobennan na San Nicolas pa scoge e carera bunita y importante aki den Aruba su industria principal; turismo.”