Aruba Hotel & Tourism Association (AHATA) a haci un contribucion significativo di AFL 5000 na Shami’s Creche and Playcenter na San Nicolas.
E donacion di AHATA tin como meta pa brinda sosten na cuido responsabel di mucha, algo sumanente importante y necesario pa mehora acceso na oportunidad laboral pa tur mayornan. Reconociendo e rol indispensabel cu centro di cuido confiabel ta hunga pa famianan, e asociacion ta contento di por reforsa e capacidad di e centro di cuido pa asina sigui brinda servicionan excepcional den e aña venidero.
Bou direccion di Shamila Howell na e centro funda pa su mama Mercedes, Shami’s ta hunga un rol importante den comunidad, brindando servicio di cuido di calidad pa muchanan. Shami’s ta especialmente yuda famia di menos recurso y asina duna oportunidad na e mayornan pa por bai trabao y ta tin entrada.
Shami’s Creche and Playcenter ta oficialmente registra cu Departamento di Mucha y Hoben (DMH), e entidad gubernamental cu ta percura pa ehecucion efectivo di e Ordenansa Nacional Centro di Cuido di Mucha. E donacion a wordo presenta pa Presidente & CEO di AHATA, Sra. Tisa LaSorte, durante un bishita na e creche acompaña pa Beleidsmedewerker encarga cu liderasgo di DMH, Sra. Sue-Ann Ras, y Beleidsmedewerker di DMH, Sra. Surella Croeze.
E centro ta cumpli cu rekesitonan di e Ordenansa Nacional y ta atende y duna cuido na muchanan den un bario cu hopi reto, ofreciendo e muchanan un ambiente sigur, educativo y cariñoso. “Ora bo traha cu mucha cu curazon, bon cos ta pasa”, Sue-Ann Ras a comparti.
AHATA ta comprometi na apoya esfuersonan den comunidad cu ta promove participacion den mercado laboral y bienestar general.
