Despues di a scucha e noticia precupante di e falta di fondo cu fundacion Ban Uni Man Pa Cria Nos Muchanan ta enfrentando, Aruba Hotel & Tourism Association (AHATA) a haci un donacion pa yuda e fundacion. E suma cu ta wordo duna lo yuda e fundacion sigui sostene e cantidad di muchanan cu ta inscribi serca nan. Mientrastanto Presidente y CEO di AHATA Sra. Tisa LaSorte lo bay sinta cu Directiva di e fundacion pa discuti e forma cu AHATA por sostene nan na un forma structural.
Como AHATA ta un organisacion di dunador di trabao cu ta traha pa e sostenibilidad di Aruba su turismo y economia, un parti grandi y esencial ta pa segura un bon educacion pa nos muchanan. E ta hopi importante pa cada mucha come un bon desayuno pasobra e ta yuda e mucha su capacidad pa concentra y siña miho.
