Aruba Hotel and Tourism Association (AHATA) ta sigui cu nan compromiso pa inverti y apoya e sector di enseñansa cu un donacion na e curso di Bartender di Enseñansa pa Empleo (EPE). E donacion aki ta consisti di material nobo di calidad halto cu lo eleva e programa y beneficia mas o menos 140 alumno anualmente.
Como un asociacion di dunador di trabou cu ta priorisa e sostenibilidad di Aruba su turismo y economia, AHATA ta activamente trahando riba varios iniciativa pa haci enseñansa di calidad den e sector di hospitalidad mas accesibel pa nos comunidad. E contribucion aki ta parti di e esfuerzonan continuo di e asociacion pa apoya alumnonan y atende na e demanda di e mercado laboral.
E donacion a ser presenta pa Sra. Tisa LaSorte, Presidente y CEO di AHATA, na Sr. Javier Croes, maestro di e curso di Bartender, ken ta actualmente F&B Manager di Renaissance Wind Creek Resort. Directora interno di EPE, Sra. Sabine de Groot y Programma Coordinator HORECA di EPE, Sr. Francis Trimon, tambe tawata presente pa e ocasion.
AHATA ta remarca e importancia di enseñansa accesibel y di calidad, mirando cu servicio exepcional ta e pilar di e exito di nos industria turistico. E asociacion lo sigui busca mas oportunidad pa inverti y aporta na varios instituto di educacion na Aruba, pa asina sostene e futuro generacion di profesionalnan den e sector di hospitalidad.
