AHATA: RevPAR ta e indicador principal di resultado

 Aruba Hotel & Tourism Association (AHATA) ta acumula e cifranan di ocupacion y prijs di hotelnan tur luna y CEO di AHATA, Tisa LaSorte, ta raporta cu den prome 7 luna di 2023 tin un patronchi di menos ocupacion compara cu 2019 pero cu prijs mas halto pa cada camber. E resultado ta cu RevPAR, cual ta e indicador principal, ta sigui mas halto cu na 2019 y aña pasa. 

JULI 2023:

• Ocupacion: E grado di ocupacion tabata 78%; cual ta 5% menos cu grado di ocupacion na Juli 2022. 
• ADR: E balor averahe di cada camber bendi tabata $323.50; un aumento di 9% compara cu Juli 2022.
• RevPAR: E entrada averahe pa tur camber disponibel tabata $252.10 cual ta un crecemento di 3% compara cu Juli 2022. RevPAR ta e indicador di e resultado financiero prome cu desconta gastonan operacional y impuesto.

JANUARI – JULI 2023:  

• Ocupacion: E ocupacion averahe di prome 7 luna tabata 79%; un aumento di 9% compara cu e mesun temporada na 2022. (Nota: Den prome kwartaal di 2022 Aruba su turismo tabata tin efecto di COVID).
• ADR: E balor averahe di cada camber bendi tabata $358.15; cual ta 14% mas cu mesun temporada na 2022.
• RevPAR: E averahe di prome 7 luna tabata $283.31; 24% mas compara cu e mesun temporada na 2022. 

PROYECCION: 

Proyeccion actual pa ocupacion averahe di hotel pa Augustus ta 76%, September ta 69%, y Oktober ta 71%. Expectativa pa ful aña 2023 su ocupacion ta 77%, cual ta representa un reduccion di 9% compara cu e averahe di aña 2019. 

TIMESHARE:

Ocupacion na propiedadnan Timeshare tabata 82.6% na Juli 2023.