ORANJESTAD,Aruba
Aruba Hotel & Tourism Association (AHATA) ta acumula e cifranan di ocupacion y prijs di hotelnan tur luna, y pa luna di Maart 2020 e CEO di AHATA Tisa LaSorte ta confirma cu e crisis di COVID-19 a afecta turismo den e luna di Maart drasticamente.
MAART 2020
Ocupacion: E ocupacion na hotelnan a baha cu 48.4 punto compara cu Maart 2019, yegando grado di ocupacion di 41.7%. Esaki ta un nivel di ocupacion cu ta trese perdida financiero.
ADR: E balor averahe di cada camber (ADR) den Maart a baha cu 3.5% compara cu un aña pasa, yegando $333.25.
RevPAR: E entrada averahe pa tur camber disponibel, na Maart tabata $138.93; un reduccion di 55.4% compara cu un aña pasa.
E crisis a corta nos turismo na mita den luna di Maart y na April ta conoci cu tin 0 turista y 0 entrada na hotelnan di Aruba y otro companianan miembro di AHATA. AHATA ta proyecta cu e situacion di 0 turismo lo dura varios luna y cu lo experiencia un trayectoria di recuperacion hopi largo. E realidad ta cu tin hopi compania cu no por sobrevivi varios luna sin entrada.
E situacion sin precedente ta pidi pa accion di gobierno pa ofrece pakete di alivio na sector priva, pa por mantene mas hopi compania posibel den un posicion pa por habri nan porta bek y keda ofrece empleo den futuro. Sin commercio no tin empleo y no tin entrada pa presupuesto di gobierno. Ademas, nos gobierno mester demostra responsabilidad durante e crisis desastroso y baha gastonan drasticamente den su presupuesto. Awor mas cu nunca ta tempo pa vision, sabiduria,responsablidad y accion decisivo pa salvaguardia nos pais su futuro.
