ORANJESTAD,Aruba
Aruba Hotel & Tourism Association ta alerta comunidad cu Aruba actualmente ta pasando den un ‘tormenta perfecto’; esta un combinacion di circunstancia y sucesonan cu ta causa un peliger grandi pa nos economia y futuro financiero di nos pais.
Na mes momento Aruba ta experiencia e siguiente desaroyonan negativo:
- Inventario di camber di hotel den Caribe ta creciendo y habriendo bek, creando mas competencia den region y e demanda pa Aruba ta bahando.
- Inventario di camber di Aruba ta na punto di crece cu hotel nobo.
- Falta di empleado cualifica pa yena tur cupo di trabou y mantene nivel di servicio halto.
- Dependencia halto di nos turismo riba mercado Mericano (80%).
- Aña di eleccion presidencial na Merca, cu historicamente ta causa cu turistanan Mericano ta warda pa gasta placa.
- Efecto di Coronavirus riba turismo (miedo di biaha) y riba economia, causando cancelacion y reduccion di reservacion.
- Imagen di Aruba cu nos ta un destinacion caro.
Mientrastanto Gobierno di Aruba ta sigui impone mas impuesto y otro medidanan riba sector comercial y comunidad, subiendo mas ainda e costo ya halto di haci negoshi cu e resultadonan cu prijsnan mester sigui subi pa nos residentenan y turistanan.
Gobierno di Aruba ta uzando miyones di presupuesto di A.T.A. destina pa mercadeo pa cubri otro gastonan cu nan tin, net na momento crucial cu mester fondo pa sigura demanda pa Aruba y diversificacion di e mercado turistico. Segun ley, e surplus di e presupuesto di A.T.A. ta destina pa gobierno cada aña, pero awor gobierno ta sacando mas placa di e fondo destina pa mercadeo internacional.
Gobierno di Aruba ta bay asina leu pa cambia e ley di A.T.A. Sui Generis pa asina e fondonan di room tax reserva y necesario pa mercadeo internacional, bay pa presupuesto general di gobierno y yuda cubri nan deficit financiero. Inicio di A.T.A. Sui Generis tabata resultado di un MOU entre gobierno y AHATA, den cual a acorda cu e fondonan di room tax ta reserva pa mercadeo internacional. E cambio di ley ta bay contra e principio di e MOU y contra interes di nos pais.
Mas preocupante ta cu e cambio di ley lo duna dos Minister derecho di dicidi cuanto lo entrega na e presupuesto di A.T.A. cada aña. Esaki lo sosode sin ningun criteria of garantia pa un cantidad of porcentahe minimo cu ta necesario pa mercadeo, pero alabes mas preocupante sin criteria pa participacion di nos expertonan den turismo y mercadeo.
Cu e desaroyonan negativo aki, Gobierno di Aruba ta poniendo nos pilar economico, nos posicion financiero y pan di nos empleadonan den turismo, na peliger. Tur esaki pa cubri buraconan financiero den presupuesto cu ta existi pa motibo di mal maneho gubernamental den ultimo decadanan.
