Aruba Airport Authority N.V. (AAA) ta raporta riba Aeropuerto di Aruba su prestacion den luna di Juni 2021, un otro luna di recuperacion solido desde cu e pandemia a cuminsa na Maart 2020.
Den Juni 2021, Aeropuerto di Aruba a procesa 84,754 pasahero cu a sali for di Aruba. E cantidad di pasahero na salida tabata 20% mas cu e luna anterior. Durante e ultimo luna, Aeropuerto di Aruba a recupera 80% di e cantidad di pasahero cu a sali durante e mesun luna na 2019. Den Juni 2021, 74,566 pasahero (pax) a biaha pa Merca, 4,384 pax pa Europa, 2,235 pax pa Antiyas Hulandes y 3,569 pax pa Latino America. E cantidad total di pasahero cu a sali for di Aruba den Juni ta 83% mas halto di loke a wordo premira pa e luna aki.
Un Passenger Load Factor (PLF) averahe na salida di 80% (cantidad di asiento ocupa den e cantidad total di asiento disponibel abordo na momento di sali for di Aruba) a wordo yega pa e mercado Mericano durante Juni 2021. E PLF averahe pa tur mercado tabata 78% durante e mesun temporada (compara cu 2019, unda e PLF averahe pa tur mercado tabata 85%).
Durante e ultimo luna, Aeropuerto di Aruba a atende un averahe di 26 buelo pa dia, esaki ta menos si compara cu 35 buelo diario durante e mesun temporada na 2019. Den Juni 2020 nos a atende solamente 53 buelo pa full e luna mientras cu nos frontera tabata sera pa operacion comercial.
