Na aña 2021 Entidat Públiko Boneiru a pone pasonan grandi i a solushoná e problema struktural kaminda ta usa ménos sèn ku tin disponibel. Na aña 2021 e resultado ta USD 1,0 mion positivo. Esaki ta un logro grandi i Entidat Públiko Boneiru ta kontinuá ku esaki den aña 2022. E esfuerso ku Entidat Públiko Boneiru a hasi for di aña 2021 pa loke ta trata e proseso di mehorashon di Finansa i mehorashon di forsa di ehekushon a tradusí su mes den e kuenta anual di 2021.
Na aña 2021 a solushoná e insiguridatnan ku nan a konstatá den e relato di akountent di aña 2020 relashoná ku balorashon di invershonnan, kompanianan di gobièrnu, kobransanan i estado kompleto di entradanan. Ku orguyo Entidat Públiko Boneiru por informá ku e akountent a entregá un deklarashon di kontròl aprobatorio pa konfiabilidat i legalidat di e responsabilisashon di aña 2021. Sinembargo pa henter aña 2021 mester emití sí un deklarashon di apstenshon di wisio, pa motibu ku e sifranan komparativo di aña 2020 tin un deklarashon di kontròl di abstenshon di wisio.
Pa un gran parti a eliminá e ‘management letter punt’-nan ku na aña 2020 ainda a sòru pa un apstenshon di wisio. A balorá e kobransanan di impuesto i pa aña 2021 a eliminá e insiguridatnan den entradanan di èrfpagt, ofisina di haf i lots i e entradanan relashoná ku maramentu di barku i e tempu ku un barku ta keda mará den haf. A balorá e kompanianan di gobièrnu di Entidat Públiko Boneiru manera WEB, BOG, OTB, BIA i OBNA korektamente i e solvensia di Entidat Públiko Boneiru ta bon. E forsa di resistensia ta riba e norma. Entidat Públiko Boneiru ta disponé di un posishon finansiero sufisientemente salú i pa e motibu akí e ta bon ekipá pa por atendé ku eventual kontratempu den futuro. Entidat Públiko Boneiru ta sigui hasi esfuerso pa na aña 2022 logra e meta di un deklarashon di kontròl aprobatorio (kompleto).
