E siman cu a pasa, mi a ricibi un reconocimento di Fundacion Cinearuba, cu mi a acepta cu cariño y
aprecia inmensamente.
Tawata exactamente 10 aña pasa, despues dje exito inmenso di e pelicula “ABO SO” dedica na nos,
den feliz memoria Padu Lampe, cu mi tawata acerca pa Juan Fransisco Pardo proponiendo mi pa ta
miembro di bestuur di Cinearuba.
Pa por drenta bestuur di un Stichting nobo, mester tin e confiansa den esunnan cu nos ta
bay traha activamente cu nan. E confiansa aki mi a sinti ora mi a haya Juan su yamada.
Den “ABO SO”, mi tawata rondona pa, e mihonan di Aruba. Pa menciona Miguel Genser,
Rafaela Mahadeo, Luty Martines, Tyron De Freitas, Valerie Croes, Edjean Semeleer, Mak
Koolman, Sergio Jansen, Lionel Dorothal, Daphne Martijn, Rebecca Roos y demas excelente
cast. Trato y guia tawata excelente. “Hasta mi prome AUTO di 0 KM, e tempo ey, a disfruta
hunto cu mi den ABO SO”.
E cancion cu mi a cera conoci cu ne y cu te awe ta zona den mi mente ta: MIN'SA, MIN'SA
KICO MI HACI MAS, MIN'SA MIN'SA KICO MI PURBA MAS, MIN'SA KICO MI HACI MAS, PA MI
GANA BO CURASON…
Durante e añanan aki mi a cumpli cu Cinearuba su reunionnan y condicionnan controlando si
tur cos ta cana na ordo. Orguyoso mi ta sigur tambe di produccionnan manera CIUDAD
ORAÑO cu a pasa na pantayanan di television nacional.
Pensando riba educacion y sosten di nos idioma Papiamento, mi a percura pa Cinearuba su
pelicula "ABO SO" a ser pasa den lesnan di Papiamento di varios scol secundario na Aruba.
Pa menciona Colegio Nigel Matthew, St. Augustinus College y claro Filomena College MAVO.
Danki na eo. maestronan di Papiamento y CKV, Mariela Carrion, Jarissa Dubero y Rubia
Bernabela.
Danki na Cinearuba, mi a siña kico ta actuacion, mi a participa activo como ACTOR den otro
7 peliculanan local, cu productornan Desiree Croes y Felix de Rooij di Corsou.
Tambe mi a siña con ta deal cu asuntonan y responsabilidad serio cu un Fundacion ta trece
cu ne. Cada fundacion tin su meta y hunto, sin beneficio propio, mester traha pa logra e
meta aki. Di Cinearuba ta pa keda promove y realsa, mas cu por, E ARTE di EDUCA PA
MEDIO DI CINE!!
Danki compañeronan di Cinearuba Juan Fransisco Pardo, Adriano Nanof, Luty Martines y
Rafaela Mahadeo pa tur sosten y confiansa, ultimo 10 añanan. Danki p’e sorpresa unico y
bunita aki.
