The Hilton Aruba Caribbean Resort & Casino a organisa un actividad boluntario pa miembronan di e team bao e slogan di Let’s Clean A Beach recientemente. E boluntarionan a bini for di varios departamento anto a pasa full rond di e costa entre California Lighthouse y areanan protehi di duinen. E coleganan, cu hopi energia y entusiasmo, a colecta un gran cantidad di sushi na e area relativamente keto aki panort di nos isla.
E resort ta regularmente dedica algun ora na loke ta limpiesa di nos beachnan, na unda cu boluntarionan ta bay rond pa colecta y deshaci di desperdicio na nos costanan.
Den cuadro di actividadnan pafo di e resort, e departamento di recurso humano recientemente a organisa un hike bao iniciativa di Let’s Go Hiking for di 5pm pa 7pm Diabierna atardi. Esaki ta na un trail den Rooi Prikichi unda cu e grupo a bay pa un hike di casi dos ora hunto den un area cu ta conoci manera un di e hogarnan pa Aruba su parhanan di mas colorido, e Prikichi. Tur participante a disfruta di un dushi tempo, descubriendo algun areanan scondi den compania di nan coleganan. Luna pasa, e mesun grupo aki a bay hike na un otro trail cu ta cuminsa na Savaneta y yega te na Parke Nacional Arikok.
