ACE Kids Club ku tremeno presentashonan eksitoso na Aruba

E grupo di teater ACE KIDS CLUB  tabatin un tremendo siman na nos hermana Isla Aruba. 

Un total di 10 miembro huntu 3 lider a biaha pa Aruba e siman tras di lomba pa representá Boneiru den e kompetensha anual di Gang di Arte Aruba. ACE kids Club ta konosí pa nan kantikanan pa mucha i tambe nan presentashonnan di teater i baile ku e meta pa konsientisa i entretené. 

Ta asina ku tur aña Aruba tin nan kompetensha di talento Gang di Arte i e aña aki ACE Kids Club a keda invitá pa presenta den e “Show time” ku un show yamá “Nos stima Boneiru” ku e meta pa promové Boneiru komo un isla ku siudadanonan ku ta stima i kuida nan tera, ku tur hende ta Bon Biní na Boneiru. E muchanan a train intensivamente durante dos siman largu na e presentashon aki pa Zoë Bernardina, Joënny Molina i Sulaika Toppenberg Lourens.

For di dia 19 di yüli ACE Kids Club a biaha pa Aruba i regresa nan kas bèk 24 yüli mainta. Durante di nan estadia na Aruba nan tabatin direfente aktividat, kuminsando ku un presentashon dia 21 di yüli mainta na e Telearuba den e programa “Nos Mainta”, anochi nan a presentá na e gran final di Gang di Arte na sentro di bario Dakota. 

Dia 22 di yüli nan a haña e oportunidat di presenta na “Miss Teen International Aruba” na Cas di Cultura. Aparte di e diferente presentashon e muchanan a haña tayer di baile i aktuashon serka Ferdinand Franca, un artista konosí na Aruba i aktividatnan social emoshonal ku ta importante pa e desaroyo di nos muchanan. 

Danki na nos muchanan: Kayliane Soliano, Q’shainy Beaumont, Zaymari Rojas, Darâilisha Helena,Danisha Cortorreal Hernandez, Layza José Leijnse, Davenley Lauffer,Clisiantely Cruz Brito, Maycy Trenidad i Keithley Torregrosa ku a sa di halsa Boneiru su nòmber un biaha mas.

Art Culture Education Foundation ta sumamente agradesí na OLB/SKAL, Departamento di Cultura Aruba, Fundashon Wega di Number Boneiru i Landslotterij pa hasi e interkambio kultural aki posibel.