Ace Kids Club lo kuminsa ku su periodo nobo di lesnan di arte, ku un dia habri dia 4 di september. E lesnan ta pa mucha di 5 te ku 11 aña. E dia habri lo tuma luga, den sentro di Bario Tera Cora, kuminsando mitar di dies di mainta te diesdos’or di merdia.
Partisipashon ta kompletamente gratis e dia aki.
Ace Kids Club ta un skol di arte ku ta kai bou di “Art Culture Education Foundation”.
Un fundashon ku tin komo meta promove Arte, Kultura i Edukashon na Boneiru via di proyektonan edukativo riba e tereno di músika, baile, teatro, arte plástiko, arte visual i muchu mas. E coachnan principal di ACE Kids Club ta Segni Bernardina i Lilimar Valencia.
Tin varios coach invita ku lo duna nan aporte na kresementu di nos muchanan den nan talento.
Den final di aña 2020 Ace Kids Club a kuminsa ku su prome proyekto kual tabata un videoclip spesialmente pa e temporada di pasku “Ata Pasku a Yega”. Seguidamente den e luna di mart di e aña aki Ace Kids Club a organisa un siman di tayer “ Vacation Art School”. Durante di e siman aki a krea e videoclip “Boneiru Corona Free” . Den e clip aki e muchanan a aktua kanta i i balia. Despues di e proyekto aki ACE Kids Club a sigui krea mas proyekto edukativo manera e videoclip di “Mama mi Stimabu” i e videoclip “ Mi Tata ta Kampion”. Tur e clipnan aki ta riba e kanal di You Tube di ACE Kids Club. Aparte di esei ACE a krea un obra teatral ku tin komo titulo “E Palu di Kuenta”. Pronto pueblo di Boneiru lo por disfruta di dje.
Mirando e interés bou di mas mucha ku kier bira miembro di ACE Kids Club, a disidi di habri mas oportunidad pa muchanan ku tin talento por inskribi. Pa e motibu ei a habri inskripshonnan nobo. Tur mayor ku tin interés pa nan yu/nan sigui desaroya nan talento den e mundu di arte por inskribi nan yu awor.
E lesnan lo tuma luga na sentro di Bario Tera Cora.
E kontibushon pa luna ta kuminsa for di $30 pa kada disiplina pero si skohe e pakete di 4 diferente disiplina(baile, kanto/musika, aktuashon i arte plastiko/visual) e ta kosta $100 pa luna. Inskripshon ta kosta $25.
Lastu dia di inskripshon ta dia 4 di september. Riba e mainta aki di 9:30 pa 12or di merdia lo tin un dia habri kaminda e muchanan lo por eksperensia lesnan di arte ku Ace Kids Club ta brinda.
Pa mas informashon tokante inskripshn, dia i ora di e lesnan por tuma kontakto
via di acesbonaire@gmail.com of por manda un whatsapp pa:
Segni Bernardina na +599 796 5677 of Lilimar Valencia na +5999 665 8177.
