Den kuadro ku preservashon i desaroyo di arte i kultura na Bonaire, Art Culture Eduation Foundation ta anunsiá su próksimo evento. Bonaire Kids Music Festival, un evento yena ku músika i aktividatnan pa muchanan i famia. E “headliner” di e aktividat aki lo ta Angelitos Curacao ku lo tei e dia aki ku nan kantikanan di ántes i tambe nan hitnan di momentu. Pa e aña aki Kids Music Festival ta karga e tema, “Mucha mester tende kantika di mucha”. Esaki a wòrdu skohe pa motibu ku esaki ta un di e puntonan di atenshon ku mester atendé den nos komunidat.
Estudionan a prueba ku músika tin hopi influensia riba mente i komportashon di hende. Lamentablemente muchanan ta skuchando kantikanan ku no ta apropiá pa nan. Esaki ta planta ideanan i tópikonan adulto den nan kabes ku konsekwensia ku e momentu ta yega ku tópikonan rondó di seksualidat, droga i violensia ta keda planta den nan kabes na un edat hopi yòn i ta wòrdu normalisá den nan bista di mundu.
ACE Foundation por medio di ACE Kids Club i ACE Tweens den último añanan kreando vários kantika nobo pa muchanan i tambe kantikanan ku famia kompletu por disfrutá sanamentu di dje. Esaki lo wòrdu enfatisá durante di e aktividat aki ku e presentashon nan di ACE Tweens i Angelitos. Banda di e presentashon nan riba esenario tambe ta bai tin entretenimentu di e DJnan hóben di Gang di Arte Bonaire, diferente wega pa mucha kaminda nan lo por gana premio i tambe un skina di kuenta pa mucha. Tambe lo bai tin bonser pa muchanan. Naturalmente un bar i kushina lo ta bon surti.
Bonaire Kids Music Festival 2023 lo tuma lugá djasabra 23 di Novèmber próksimo na Sentro di Bario Tera Cora di 15:00 – 21:00. E presentashon nan di ACE Tweens i Angelitos lo tuma lugá den dos grupo. Grupo A ku ta di 15:00 – 18:00 i Grupo B ku ta di 18:00 – 21:00. Den próksimo dianan lo publiká e programa riba nos paginá di Facebook, ACE Foundation. E karchinan “Early Bird” ya ta disponibel na un preis spesial di $10 pa karchi. Despues lo saka e karchinan ku preis regular di $15 pa karchi. Karchinan ta disponibel na Joshantie’s Multi-shop i tambe na number di telefòn +599790-0155. 
