ORANJESTAD, Aruba
Cu stapnan firme y sigur, nos ta conbati e problema di abuso di menor
Desde cu Gabinete Wever-Croes a cuminsa goberna, mesora a nota un negligencia grandi riba e veld social pa cua motibo tambe mesora a cuminsa traha riba e Social Crisis Plan. E plan aki ta traha riba e crisis social mientras tambe Gobierno ta trahando riba e prevencion di problemanan social na Aruba specialmente riba abuso di menor pasobra abuso di mucha ta condenable y mester stop.
Gobierno, bou inicio di Prome Minister Evelyn Wever-Croes a institui un comision pa analisa e situacion di problemanan cu nos tin referente violencianan den relacionnan, violencianan domestico, abuso contra muchanan y abuso contra hende muhe. Despues cu e investigacion aki a termina, e comision mester duna conseho na Prome Minister. Señora Lisette Geerman-Gomez ta presidi e comision aki, ‘Sexueel Misbruik van Minderjarigen’.
Diaranson 19 di augustus, e comision a sinta cu Sra. Layhing De Kort-Yee cu ta un researcher di Capstone Research Group. E lo bay yuda cu un research en general na tur e stakeholdersnan y tur caminda cu e comision indica cu tin cierto buraconan habri cu ta stroba cu investigacion pa na final haya un bon rapport di Capstone Group como tambe consehonan pa asina por completa un conseho final pa Gobierno.
Docter Louise Rafael-Croes tambe a uni na e team den e reunion aki cu sigur ta duna esaki un forsa mas grandi. Docter Rafael-Croes ta un experto riba e tema aki pa mas di 20 aña. E ta haci investigacion na muchanan y ta bon na haltura di e problematica di abuso sexual di mucha.
E comision ta planiando riba e parti preventivo cu ta hopi importante cu ta inclui programanan di television y forum di prevencion pa asina por cuminsa inculca den e muchanan tambe con pa cuida nan mes.
Prome Minister Evelyn Wever-Croes: “E problematica aki no ta facil sino mas bien hopi delicado. Nos sa cu e problemanan social den nos comunidad ta grandi, y cu lo tuma tempo prome cu claridad vence scuridad. Sinemargo nos mester para keto na un punto hopi crucial. Esaki ta prioridad number un desde di inicio di gobernacion di Gabinete Wever-Croes y ta keda e prioridad number un tur dia pa percura pa nos muchanan wordo protehi. Pasobra nos muchanan ta mira riba adultonan pa protehe nan pa cua motibo Gobierno ta pone esaki como prioridad hopi halto riba agenda den gobernacion. Cu stapnan firme y sigur, nos ta conbati e problema di abuso di menor”.
