Aruba Birdlife Conservation y Minister di naturalesa Ursell Arends ta cometiendo un blunder nacional. E mes un abogado Geert Rep cu ta traha pa Aruba Birdlife Conservation y cu tambe ta forma parti di hunta di directiva di Aruba Birdlife Conservation, ta e mes un abogado cu ta conseha minister di naturalesa Ursell Arends den e mes un caso di Hotel Embassy Suites ( Orden van advocaten esaki POR? ,esaki ta corecto ?), e situacion sigur ta hole hopi yerbe putri, un conflicto di interes enorme pa cu conseho pa decisionnan politico pa Land Aruba. Redaccion di EA News por a compronde for di varios yamada cu a drenta na nos mesa di redaccion cu, esaki ta e sistema di operacion di abogado Geert Rep unda cu ta hunga dobel tabla y ta perhudica sea companianan y of hende nan y awo por mira cu a bay den un stap mas halto den teritorio politico unda cu hasta e mandatario e abogado a changa.
Pa prome biaha den historia un Minister ta manda prome minister corte pa un decision cu a ser tuma corectamente na progreso di Aruba. Tereno na unda Hotel Embassy Suites ta actualmente ta un tereno cu a ser duna, ahusta y awe por bisa cu tin un hoya di hotel riba e tereno.
Sinembargo loke ta un realidad cu e caminda dilanti di e hotel ta un caminda cu ta frecuenta hopi cu trafico y tampoco no tin luz pa ilumina na momento cu ta crusa caminda. Pa siguridad di e turistanan a pidi gobierno permiso y a traha un tunnel bao di tera pa asina e turista por yega safe na e beach pa e por descansa.
Banda di cu e ta un inversion pa siguridad pa e turista e ta un inversion cu por mercadia e hotel tambe mirando cu Hotel Embassy Suites ta e unico hotel na Aruba y den Caribe cu tin tunnel pa yega beach, henter e inversion aki Aruba no mester a paga nada , pero e hotel a hinca placa den economia di Aruba.
E inversion di esaki ta uno hopi grandi pa siguridad di nos turistanan. Sinembargo e proceso aki tin varios aña andando pa Hotel Embassy Suites ricibi e permiso pa nan por drecha e beach dilanti di e hotel, lo hinca mas di 90 miyon dollar pa embeyece e parti aki y haci e producto Aruba mas fuerte y mas gusta pa turistanan di calidad bin Aruba.
Despues di basta lucha algun dia atras Hotel Embassy Suites a ricibi nan aanlegvergunning for di DIP y tabata cla pa asina inverti den e economia. Sinembargo pa sorpresa Minister Ursell Arends a para e proyecto door di conseho di Aruba Birdlife Conservation dirigi pa Greg Peterson y su abogado Geert Rep cu ta e mes un abogado di e mandatario tambe.
Pa straño cu e ta zona e mes un abogado cu ta abogado di minister Ursell Arends ta abogado di Aruba Birdlife Conservation, esaki ta mustra di un conflicto di interes y ta creando un conflicto den gobierno. Den boca crioyo bisa (ta changa e minister ora nan kier ), un abogado por fungi su trabao asina ?
Mester bisa acerca no ta prome proyecto cu Aruba Birdlife Conservation ta hinca den problema y tin cu cana caminda pa corte. Hotel Embassy Suites a keda para debi cu Aruba Birdlife Conservation kier conserva yerbe nan den lama y Hotel Sectrets a keda para paso Aruba Birdlife Conservation kier conserva neishinan di shoco na San Nicolas. Mientrastanto cu tur dos e proyectonan aki ta para e economia di Aruba ta keda stanca door di decisionnan di Aruba Birdlife Conservation.
E problema y e impacto economico negativo cu Aruba Birdlife Conservation ta haci riba Aruba ta un daño enorme pa e desaroyo economico, esaki sigur mester keda evalua si e futuro di Aruba mester keda para pa pensamento y cuido di naturalesa door di Aruba Birdlife Conservation unda cu cantidad di hende ta perde trabao y ta minimalisa e nivel y producto Aruba den su totalidad.
Awe debi cu Aruba Birdlife Conservation representa pa abogado Geert Rep cu ta e mes un abogado di Minister Ursell Arends ta perhudicando un desaroyo positivo pa Aruba su economia y producto Aruba. Tin hopi pregunta ta cuminsa flota si e operacion di e abogado ta algo cu e por haci?
Minister Ursell Arends cu a keda mal conseha door di Aruba Birdlife Conservation y su abogado Geert Rep a lanta un caso contra di su propio gabinete, un situacion no usual y no normal ta pasando na Aruba, practicamente por bisa cu abogado Geert Rep a changa e mandatario y trece un sfeer malo den henter gabinete Wever Croes, pero banda di esaki esun cu ta gana mas placa ta e abogado Geert Rep y e pueblo di Aruba ta esun cu ta bay perde mas, mirando cu ta pueblo di Aruba mester bay paga pa e mal conseho aki cu un abogado cu ta representa Aruba Birdlife Conservation y e mes un abogado aki cu Land Aruba ta page pa e bringa propio land Aruba. Sin duda na Aruba si ta pasa cosnan straño.
