Den nos comunidad ta existi burnout kisas hopi di nos no ta reconoce esaki, pero e ta afecta nos salud den diferente forma. Pa cu e tema aki Director di Effective Business Solutions Eugenia Jenny Andries ta kere cu mester para keto un rato y pone atencion riba e topico aki. Hopi biaha nos ta lubida riba nos mes cu ta causa e burnout. Lo organisa un live class cu e tema di burnout & recovery.
E motibo cu a tuma e decision cu a bin cu e live class ta debi cu ta mira cu mas y mas den nos comunidad tin personanan ta sufri di burnout. Esaki ta un tema cu lastimamente no ta wordo duna atencion riba dje manera mester ta, pero ora cu sinta cu companianan loke ta saca afo ta cu nan empleadonan ta demotiva, di un manera of otro ta perde interes of nan empleadonan ta na cas AO pa motibo di burnout. Sinembargo burnout no ta keda reconoci como un condicion medico, asina mes ta importante pa duna atencion na esaki debi cu e ta afecta den un manera emocional y mental na e empleado.
Loke cu e empleado ta experencia manera un cansancio na pia di trabou, unabes cu ta na cas ta sinti bon y ta haci otro tipo di trabou y ta sinti bon ta un indicacion. Pesey mes burnout ta locual cu ta experencia na pia di trabou cu no por funciona mas manera tabata funciona antes.
Segun Director di Effective Business Solutions Eugenia Jenny Andries mirando cu mas y mas nos hendenan ta keda afecta ta kere ta importante pa trece un poco mas di conscientisacion pa cu e tema aki pa educa nos comunidad kico ta e posibel solucionnan cu por tin y alivia e sentimento.
Ta importante pa ta consciente kico ta burnout,kico ta e señalnan di burnout, sintomanan, factornan di risico pero mas importante ta sa con por trata cu esaki. Burnout ta un parti di bida cu por keda trata y por preveni esaki tambe.
Banda di esaki Director di Effective Business Solutions Eugenia Jenny Andries ta duna di conoce cu ta haci diferente training nan administrativo unda cu ta duna e empleadonan tur e toolsnan pa haci nan trabou mas efectivo y cu profesionalismo, pero awo a tuma nota no ta solamente e hard skills ta necesario , pero e soft skills cu ta e inteligencia emocional ta mes importante e toolsnan cu locual e trahado tin mester pa eherce e trabou.
Segun Director di Effective Business Solutions Eugenia Jenny Andries aki ta caminda cu ta kere cu e empleado no ta completo mirando cu hopi biaha nos muchanan ta bay scol y ta studia un richting y ta specialisa pero con nan ta trata cu otro na pia di trabou, con nan ta comunica cu otro cu ta trata di team work , team building no tey.
Atrabes di e añanan ta haya hopi falta di e parti aki y aki ta caminda cu Effective Business Solutions kier yuda pa trece educacion riba e soft skills , pero tambe kico ta e problematico nan cu ta presenta na pia di trabou cu tin di haci cu salud mental y salud emocional. Actualmente no por wak e empleado solamente den e trabou cu e ta eherce, pero mester wak e tambe cu e ta un persona cu e ta sinti y e ta pensa. Esunnan cu ta interesa pa forma parti di e workshop di burnout & solutions por yama libremente na 5925480
