A.T.A: Resultado te cu oktober 2023

‘Compara cu 2019; volumen a crece cu 9% mientras cu nivel di entrada a crece aun mas ’

OKTOBER 2023 DEN COMPARACION CU 2019 Y 2022

Den luna di oktober 2023 nos destinacion a ricibi un total di 93.857 bishitante “stay-over”. Si compara luna di oktober 2023 cu oktober 2019 – cu tabata e ultimo aña normal di turismo, por mira cu Aruba a recupera 118% di locual a wordo ricibi na oktober 2019, cu ta indica un crecemento di 18%. Si compara oktober 2023 cu oktober 2022 por wak un crecemento di 12.5%.

AVERAHE DI PATRONCHI DI GASTO PA CADA BISHITANTE DEN Q2 2023
Visa Credit card su averahe den gasto pa cada cardholder a yega na un suma di $625 den Q2 si compara cu $667 den Q1 2023. Mastercard su averahe den gasto pa cada cardholder a yega na un suma di $691 den Q2 si compara cu $740 den Q1 2023.

MERCADONAN Y CATEGORIANAN DI ACOMODACION 

Den oktober 2023 81.4% di e total di e bishitantenan “stayover” pa Aruba a bishita for di Norte America, 5.9% a bishita for di Europa, 10.1% a bishita for di Latino America y 2.6% tawata procedente di otro partinan di mundo. 

Mirando e categorianan di acomodacion, den oktober 2023 26.4% di bishitante a keda den hotelnan European Plan, 19% a keda den hotelnan All-Inclusive, 28.1% a keda den Timeshare y 26.5% a keda den otro tipo di acomodacion, conoci tambe como vacation rentals. 

VACATION RENTALS 

Ta importante pa menciona cu A.T.A. tin acceso na un plataforma unda por wak e cantidad di cas, apartamento y villas cu ta wordo uza como vacation rentals como tambe e prijs averahe pa anochi, e ocupacion y un calculacion di e entrada cu esakinan ta genera.

Si compara oktober 2023 cu oktober 2022 por wak cu e prijs averahe di e acomodacionnan aki a crece cu 22% for di un prijs averahe di $202 pa anochi na oktober 2022 pa un prijs averahe di $246 na oktober 2023. Si compara oktober 2023 cu oktober 2019, por wak cu e prijs averahe di e acomodacionnan aki a crece cu 53%, for di un prijs averahe di $161 pa anochi na oktober 2019 pa un prijs averahe di $246 na oktober 2023. 

Si compara oktober 2023 cu oktober 2022 por wak cu e ocupacion averahe di e acomodacionnan aki a subi cu 4 punto di porcentahe, for di un averahe di 45% na oktober 2022 pa un averahe di 49% na oktober 2023. Si compara oktober 2023 cu oktober 2019 por wak cu e ocupacion averahe di e acomodacionnan aki a crece cu 9 punto di porcentahe, for di un averahe di 40% na oktober 2019 pa un averahe di 49% na oktober 2023. 

Den caso di entrada, si compara oktober 2023 cu oktober 2022 por wak cu e categoria a genera un crecemento den entrada di 63%. Si compara oktober 2023 cu oktober 2019 por wak cu e categoria a genera un crecemento den entrada di 212%. 

  2023 (Esaki ta e YTD)

Te cu oktober 2023, Aruba a ricibi un total di 1,011,596, bishitante “stayover”, esaki ta un crecemento di 9%, compara te cu oktober 2019, unda a a ricibi 928,230 bishitante “stayover”. Si compara e prome 10 lunanan di 2023 cu e prome 10 lunanan di 2022, por wak un crecemento di 12.4%, bayendo for di 899,766 bishitante “stayover” pa 1,011,596 bishitante “stayover”. 

2023 YTD Entrada ta sigui crece aun mas 

Ta midi entrada, es decir e ‘calidad’ di bishitante’, na diferente manera. Entre otro locual bishitantenan ta dispuesto pa paga pa un anochi di estadia y entre otro pa medio di “Tourism Receipts “ registra pa Banco Central di Aruba (yama e “Tourism Credits”). Te cu oktober 2023 por raporta lo siguiente, compara cu 2019: (a) Average Daily Rate (ADR) Hotelnan a subi cu 24% (b) ADR Vacation Rentals a subi cu 53% y (c) pa promer mitar di 2023, “Tourism Receipts” a subi cu 32% compara cu e mesun periodo na 2019.  

Pa ricibi A.T.A. su ‘Statistical Monthly Report’ tur luna, por contacta Melanie Kelly na m.kelly@aruba.com