Conforme e ley di A.T.A., tur aña tin dos momento importante, e prome ta ora di entrega e
Rapport Anual cu e resultadonan di e aña anterior y e di dos ta ora di haci entrega di e
presupuesto pa e aña siguiente. Tur aña A.T.A. a sa di cumpli debidamente cu entrega di e
Rapport Anual, incluyendo resumen di resultadonan y di trabao haci, como tambe e relato
financiero cu su respectivo ‘goedkeurende verklaring.’
E entrega oficial a ser efectua den presencia di presidente di Hunta di Supervision di A.T.A.,
Francisco Quant, miembornan di e Hunta, conhuntamente cu CEO di Aruba Tourism
Authority Ronella Croes, algun miembro di Management di A.T.A. y e representantenan di
oficina di e firma di accounting encarga cu e auditoria independiente, den e caso aki Grand
Thornton.
Procedura pa cu entregamento di Rapport Anual
E Rapport Anual di A.T.A. ta wordo manda prome pa parlamento di Aruba ‘ter inzage’ pa 10
dia di trabao. Despues di pone disponibel na parlamento, Minister di Turismo por duna su
aprobacion formal pa cu e Rapport Anual di A.T.A., e edicion di 2023 pa ta exacto.
Resultado
Den 2023, Aruba por a surpasa metanan clave stipula pa cu ‘Tourism Receipts’, ‘Stay-Over
arrivals’, ‘Revenue Per Available Room’ y ‘Cruise Tourism arrivals’. Aruba a sa di mustra
resultadonan historico. Como un pais cu ta depende riba e industria di turismo como entrada
primordial, esaki tabata un logro importante pa bienestar di nos hendenan. E entrada genera
directamente di turismo esta e ‘Tourism Receipts’ cu ta deriva di entre otro di e tres otro
componentenan menciona, ta proyecta di sera 2023 cu un crecemento historico di 34%
compara cu 2019! E aña mas fuerte cu Aruba a conoce promer cu e pandemia. Por ilustra
tambe cu a base di e resultadonan e ‘Average Daily Tourist Spending’ cu ta e averahe cu
cada bishitante ‘Stay-Over’ ta gasta pa dia ta proyecta di sera aña cu un aumento di 26%
compara cu 2019. E aspectonan aki ta importante mirando cu ta papia aki ta total di gasto y
patronchi di locual bishitantenan ta gasta y laga atras.
E ‘Visitor Satisfaction’ cu A.T.A. ta midi y comparti mensualmente tambe a score entre 9 y
10 pa luna (10 ta e score maximo).
Na 2023, A.T.A. a conta cu un total di Afl. 121,3 miyon na entrada. Considerando e tarea
principal esta esun di mercadeo, ta di menciona cu 90% di e Afl. 82,2 miyon cu a wordo
presupuesta pa gasto na mercadeo a wordo utilisa. Den contexto di A.T.A. e gasto di
mercadeo ta enfoca primordialmente den mercadona internacional, y un porcion di e Afl.
82,2 miyon ta wordo utilisa pa asina stimula e modelo turistico di ‘High Value-Low Impact’.
Sostenibilidad
Den 2023, e meta primordial di mercadeo y promocion di A.T.A. a keda basa riba e
continuidad di e modelo di High Value-Low Impact cu ta enfoca riba calidad di e bishitante y
no volumen. Turismo di Niche a hunga un papel crucial den nos enfoke pa facilita e
desaroyo sostenibel na largo plaso di e destino.
Pa duna mas aporte na e compromiso, y segun meta y obhetivo strategico central di A.T.A.,
a establece un ‘Niche Framework’ den 2023 pa prioritisa mas aun e desaroyo sostenibel.
Banda di esaki, A.T.A. a cumpli cu diferente estudio pa duna apoyo pa cu un tursimo
sostenible. Esakinan ta inclui; ‘Credit Card Visa Study’, a inisia estudionan mara na e topico
di ‘Carrying Capacity’ cu a inclui update e inventario di ‘Short Term Vacation Rentals’,
‘Events Roadmap’, ‘Luxury Cruise Line’, ‘Visitor Sentiment’. Riba nivel di desaroyo di
producto no ta solamente participa den diferente commision y ta duna hopi conseho y yuda
desaroya maneho, pero ta lidera y/of participa financieramente na proyectonan pa stimula e
desaroyo conforme e modelo di ‘High Value-Low Impact’. Por pensa riba ‘Aruba Hospitality
and Security Foundation’, ‘Aruba Excellence Foundation’, ‘Visitor Center San Nicolas’,
campañanan di Ban Serio, desaroyonan na Ayo Rock Formation, Bari di reciclahe,
restauracion di trapinan na Hooiberg, colocacion di ‘buoys’, introduccion di ‘Mountain Bike
Trails’, upgrade integral di Seroe Colorado como tambe Mangel Halto, colaboracion
estrecho cu ‘Aruba Conservation Foundation’ y hopi mas.
Ta gradici
Recientemente A.T.A. a lansa sitio web www.ata.aw caminda cu por encontra noticia, relato
di prensa, diferente rapport, informacion encuanto vacatura na A.T.A., y mas. A.T.A. su
rapport anual lo ta pronto disponibel riba e sitio aki.
Por ultimo, A.T.A. ta felicita y gradici e ekipo completo di A.T.A. pa nan trabao y pa e logro
aki di por entrega un biaha mas un rapport cu un ‘goedkeurende verklaring’. Tambe ta
gradici Hunta di Supervision, Grant Thornton y Minister di Turismo pa e diligencia necesario
pa duna nan revision y aprobacion di e documento aki. Y mas cu claro ta gradisi y felisita e
miles di trahadornan den nos sector turistico cu ta traha dia aden y dia afor cu pasion y
dedicacion na nan bienestar, y na bienestar di nos nacion! Hunto nos lo sigui bai dilanti!
Tocante Aruba Tourism Authority (A.T.A.)
Desde 1 di januari 2011, Aruba Tourism Authority ta opera como un entidad ‘Sui Generis’.
Un organizacion independiente den e esfera publico. Aruba Tourism Authority ta fungi como
‘Destination Marketing and Management Organization (DMMO)’ y ta responsabel pa uni
interes turistico entre socionan local e internacional. A.T.A. ta pone hopi enfasis riba e
modelo di “High Value-Low Impact” cu ta para pa un balanse entre aumenta e balor
economico di e bishitante, posiciona Aruba como un pais desea y sostenibel, y posiciona
Aruba como lider di desaroyo como un destinacion. Cu meta pa sigui mantene esfuerzonan
den linea segun e balanse menciona, y logra aumenta entrada pa medio di calidad di
turismo en bes di e volumen cu nos destinacion ta ricibi. Capacidad di carga ta sigui ricibi
atencion di parti di A.T.A.
