‘A.T.A. a firma acuerdo cu 5 compania’
Na aña 2021, Aruba Tourism Authority (A.T.A.) y Qredits Aruba a introduci e programa “Aruba Signature Experiences” cu e meta pa encurasha entrepreneurnan pa enfoca riba experiencia unico y inolvidabel pa nos bishitantenan.
E programa “Aruba Signature Experiences” ta consisti di dos (2) componente clave. Participante nan ta cuminsa cu e curso “Small Business Academy” di Qredits Aruba, caminda ta adkiri abilidad y conosemento pa desaroya nan Business Plan y Financial plan pa e negoshi proponi. Abase di e negoshi y concepto nan cu ta wordo entrega na fin di e curso, un commission ta evalua e concepto nan cu ta den linea cu e strategia di Niche Marketing di A.T.A. pa yega na remarke pa ta un di e ganadornan di e “Aruba Signature Experiences” program y ricibi marketing coaching y marketing support di A.T.A.
Pa diversifica e mercado turistico pa Aruba, a identifica various segmento niche cu lo atrae mas bishitante di calidad, genera mas entrada pa nos isla y na mes momento tin un impacto mas positivo ariba nos medio ambiente. E segmento niche nan identifica pa Aruba ta inclui weddings, culinary, wellness, y eco-conscious tourism. Cu esaki te desea di mantene Aruba como un destinacion competitivo y atractivo, mientras ta promove un turismo sostenibel.
Un total di 20 participante a sigui e curso di Qredits Aruba “Small Business Academy” como e parti esencial di e trayectoria. Sigui pa entregamento di un “Business plan” y “Financial plan” na Qredits Aruba. Como experto den e area di finanzas y e sector empresarial, Qredits Aruba a propone e lista final di e miho candidatonan pa “Aruba Signature Experiences”. A conta cu participantenan cu plan y ideanan nobo como tambe plan y ideanan ya estableci. Na final, a conta cu 5 participante cu a wordo nombra como ganadornan di e “Aruba Signature Experiences” y cu lo ricibi apoyo di A.T.A. pa cu nan plan di mercadeo.
A.T.A. ta contento di anuncia e siguiente ganardonan cu ta bira tambe mas pioneronan di “Aruba Signature Experiences”; Jamie Bareño cu a presenta un plan pa JB Spiritual Academy cu e servicio di preparashon y ceremonia di casamento spiritual dirigi na e mercado afluente, LGBTQ y Neurodivergent. NATURA Yoga Club & Personal Fitness Training Janine Valecillos Digier a presenta un plan cu ta ofrece servicionan relata na bienestar, Milouska Briezen cu a presenta un plan pa crea un plataforma cu lo facilita e bishitante den crea intinerario personalisa pa experiencianan unico cu Aruba tin pa ofrece, AruFlamingo Art di Boris Wever cu a presenta un plan caminda cu e bishitante por crea su propio souvenir y creacion di diferente arte cu ta inclui uso di material recicla, y por ultimo Museo Cas Tan Tin cu ta wordo patrocina pa Fundacion Mi Cutisa, cu ta promove cultura y herencia caminda cu bishitante nan por experiencia e bida tradicional di antes na Aruba.
Inscripcion pa e siguiente programa di “Aruba Signature Experiences” lo ta disponibel durante cuartal 3 di 2024. Di e forma aki, Aruba Tourism Authority (A.T.A.) y Qredits Aruba ta encurasha empresarionan pa participa, y ta felicita e ganadornan di e di tres edicion di “Aruba Signature Experiences” program. Desde lanzamento di e programa na aña 2021, pa medio di e “Aruba Signature Experiences” a yuda 11 compania cu nan concepto.
Tocante Aruba Tourism Authority (A.T.A.)
Desde 1 di januari 2011, Aruba Tourism Authority ta opera como un entidad ‘Sui Generis’. Un organizacion independiente den e esfera publico. Aruba Tourism Authority ta fungi como ‘Destination Marketing and Management Organization (DMMO)’ y ta responsabel pa uni interes turistico entre socionan local e internacional. A.T.A. ta pone hopi enfasis riba e modelo di “High Value-Low Impact” cu ta para pa un balanse entre aumenta e balor economico di e bishitante, posiciona Aruba como un pais desea y sostenibel, y posiciona Aruba como lider di desaroyo como un destinacion. Cu meta pa sigui mantene esfuerzonan den linea segun e balanse menciona, y logra aumenta entrada pa medio di calidad di turismo en bes di e volumen cu nos destinacion ta ricibi. Capacidad di carga ta sigui ricibi atencion di parti di A.T.A.
