A.T.A. den “partnership” cu AHATA a duna inicio na locual ta un momento sumamente importante pa nos
industria turístico, e Aruba Global Travel Conference, caminda cu mas di 67 representante di
companianan cu ta bende Aruba (“Tour Operators”) y aerolinea internacional lo uni pa ricibi un
actualisacion di Aruba y di nos industria turistico. Presente lo ta personanan clave di e mercadonan di
Merca, Canada, Latino America (Colombia, Brazil, Argentina, Chile, Pero, Equador y Paraguay), y Europa
(Hulanda, Italia y Alemania). Tur ta mercadonan importante pa Aruba cu lo uni den un solo conferencia.
Un total di 103 persona ta biahando pa Aruba pa e ocacion aki cu lo inclui tambe diferente
representantenan di nos hotelnan, establesi den exterior, como tambe diferente miembro di ekipo di A.T.A.
y algun prensa internacional. E invitadonan ta inclui tambe diferente socionan local kende mescos cu
A.T.A. lo reuni cu tur esnan concerni, brinda un bon bista di nos Aruba y di desaroyonan y yama sigur un
Bonbini y bisa Danki – danki pa e confianza, y e “partnership” cu ta asina importante pa Aruba.
Durante henter e siman, participantenan y socionan den e mundo turistico lo bai tin e oportunidad pa
intercambia na un manera productivo. E aña aki, lo comunica e actualisacion y direccion nobo pa turismo
riba e isla segun e plan multi anual di A.T.A. Alabes, lo comparti actualisacion di “The Aruba Effect” bou di
cual e strategia di comunicacion internacional di Aruba ta resorta. Lo presenta e capa nobo di promocion y
strategia di comunicacion internacional pa Aruba, cu enfoke evolucionario den direccion di un turismo mas
responsabel y sostenibel. Uno cu lo sigui traha pa atrae e bishitante di “High Value”, esta di balor halto.
E programa lo inclui un Mercado Turistico (Marketplace), caminda cu participantenan di entre otro
hotelnan, aerolineanan, companianan di tour y otro operadornan turistico local lo reuni y explora
oportunidadnan di negoshi y estabelece relacionnan duradero cu ehecutivonan internacional.
Aparte di e reunionan programa, invitadonan internacional lo bai gosa di diferente experencia “Low-
Impact” rond di nos isla, y lo cumpli cu diferente “site inspections” na diferente propiedad turistico. Di e
forma aki, lo percura pa crea un bon impresion di e isla y pa ekipa e companianan internacional cu
informacion valioso tocante e producto turistico di Aruba y e futuro desaroyo di un industria turistico mas
responsabel y sostenibel.
A.T.A. ta anctipica un siman educativo, caminda cu lo intercambia y estrecha lasonan nobo y existente
entre socionan local como tambe cerca e participantenan internacional. A.T.A. ta optimista cu e
conferencia aki lo sirbi como un plataforma importante pa yuda nos isla logra metanan stipula, crea
oportunidadnan nobo, y asina enrikece nos mercadonan turistico conforme e direccion desea. Ta anticipa
cu nos mundo di turismo lo briya e siman aki unda cu colectivamente lo haci e esfuerso pa brinda nos
socionan un estadia memorabel y productivo!
A.T.A. & AHATA ta duna inicio na conferencia importante: Aruba Global Travel Conference
