Oficina di Tursimo ta contento pa anuncia cu dia 17 di oktober a haci entrega di e plan & presupuesto y plan pa 2024 na Minister di Turismo. Esaki a tuma luga na Cocolishi den presencia di entre otro miembronan di Hunta di Supervision di A.T.A., como tambe e CEO.
E proceso pa yega na un plan y presupuesto ta uno cu ta tuma luga den consulta cu diferente partido. Den e ultimo lunanan, A.T.A. a tene reunionnan extenso cu miembronan di ekipo na nivel local como tambe cu ekiponan cu ta opera den mercado. A conduci diferente estudio y a tende recomendacion di socionan turistico, entre otro di AHATA. Conforme ley, A.T.A. a entrega su presupuesto y plan promer cu prome di september na Hunta di Supervision, pa finalmente presenta esaki na Minister di Turismo.
Pa determina e miho strategia pa e aña venidero, ta importante pa considera factornan externo y interno, como tambe tendencianan di biahe den e diferente mercadonan. Pa 2024 ta proyecta un crecemento di e “Tourism Receipts” esta e entrada directo pa medio di turismo pa Aruba di 6%. Esaki ta ekivalente na 5.2 biyon florin, cu lo circula den economia di Aruba. Pa loke ta trata cantidad di turista ta sostene como meta pa stabilisa esaki, cual ta mara na un proyeccion modera di 3% versus 2023. Si compara ultimo decada esta 2023 compara cu unda Aruba tabata na 2013, por conclui lo siguiente: e “Tourism Receipts a crece cu 80% na 2023 versus 2013, mientras cu cantidad di bishitante a crece cu 23% si compara 2023 cu 2013. E strategia integral ta keda ta dirigi riba sigui pusha e “value” riba e “volume”, proporcionalmente mas hopi.
E plan y presupuesto pa 2024 ta inclui diversificacion di mercadonan, unda cu ta papia di un mercado di Norte America cu ta stabilisa y un mercado entre otro di Latino America cu lo crece. E strategia ta dirigi tambe riba desaroyo di e mercado Suizo. Tambe ta pone hopi atencion na producto Aruba siguiendo asina e modelo di desaroyo turistico di “High Value – Low Impact” unda cu ta ilustra kiko a bin ta haci y lo sigui haci riba area di (a) contribucion economico (b) brinda e bishitante un experiencia di calidad halto (c) teniendo na cuenta e importancia di calidad di bida di nos habitantenan tambe y poniendo atencion na (d) proteccion di nos naturalesa y medio ambiente.
E presupuesto como tal ta inclui colaboracion cu entre otro Aruba Excellence Foundation, Aruba Hospitality & Security Foundation & Fundacion Parke Nacional Aruba, invertiendo asina ki den nos servicio y hospitalidad pa medio di entrenamento, un Aruba sigur y proteccion di nos naturalesa y medio ambiente. Tambe ta pone atencion na nos cultura, entre otro na Carnaval 70 y e Bon Bini Festival, como tambe na calidad di nos playanan y “upgrade” di nos producto turistico. Entrada ta proyecta pa keda na mesun nivel cu 2023 y e enfoce lo sigui ta riba e trabou di posiciona Aruba internacionalmente y guia e desaroyo local na un manera duradero pa medio di proyectonan menciona como tambe investigacion y conseho y recomendacionnan.
