For di algun luna caba, varios piscador y usuario di e pier cerca di ATCO, a haci un yamada na Santa Rosa pa renoba e pier aki, ta hopi uza pa piscador of usario di boto. Sinembargo, pa motibo di e limitacion financiero, tabata dificil pa Santa Rosa so carga e gasto. Sinembargo, Sr. Mark Solognier y Sr. Bob Kelly di Kustwacht, kende nan a haya informacion cu Marina Real tabata tin planea pa renova nan pier, a propone pa Santa Rosa haci e peticion oficial. Asina a logra cu a haci entrega di tur material na Santa Rosa, cu e proposito di inicia cu e trabounan di renobacion di e pier aki. Despues di algun dia, Majoor Abma y Majoor Fjeerdsma di Marina Real a manda contesta na Santa Rosa, cu nan lo haci donacion di e tur material pa Santa Rosa por continua cu e trabounan di renobacion.
Mientrastanto, durante un audencia entre Su Excellencia, Sr. Alfonso Boekhoudt, Gobernador di Aruba hunto cu Sra. Nathalie Maduro, Director pa Santa Rosa, Gobernador Boekhoudt personalmente a haci e peticion un biaha mas na Santa Rosa, pa renoba e pier aki, pa motibo cu ta hopi ta esnan cu ta haci uzo di e pier aki, incluso su famia y su mes persona. Ela keda sumamente contento, na momento cu Sra. Maduro a inform’e cu Mariniers Kazerne a haci donacion di tur material, mientras cu Kustwacht a bay di acuerdo pa coopera cu e luznan solar, pa mantene e pier safe pa esnan cu ta sali of drenta ora ta scur.
Un team traha di miembronan di ploeg di Santa Rosa, ta ehecutando e proyecto. Nan a desmantela e partinan kibra y reforsa tur hero y tur material colecta for di materialnan recycla den Santa Rosa mes. Diariamente Gobernador tabata tuma contacto cu Sra. Maduro pa follow up ariba e trabounan y a keda contento cu e cooperacion entre e 3 instancianan cu a aporta pa logra cu awe finalmente e pier a keda completa y tanto e como usuarionan haci uzo bek di esaki. Esaki tabata un muestra di con ora instancianan coopera cu otro, e impacto por ta positivo pa un grupo hopi mas grandi y especialmente ora cu Gobernador tambe ta mustra su interes den un proyecto.
Pa conmemora e bunita proyecto aki y pa dune un nomber, a keda dicidi cu e pier pabou di ATCO lo carga di nomber “Pier di Gobernador”.
Diabierna ultimo, Gobernador a pasa personalmente pa bishita e pier un rato. Ela probecha pa gradici e miembronan di ploeg cu a traha incansabel te den ora nan laat di anochi, pa renoba e pier pon’e bek den funcion den un termino corto.
Mester remarca cu un usuario cu tabata presente na e momento ey, no por a keda di sin expresa su gratitud na tanto na e 3 instancianan como na nos Gobernador pa su peticion na Santa Rosa. Danki na esaki awe e pier ta completamente renoba.
Pa medio di esaki tambe, Gerencia di Departamento di Agricultura, Cria y Pesca, Santa Rosa, kier a haci uzo di e oportunidad pa tur esnan cu a coopera pa haci e proyecto un exito. Un danki grandi na Koningklijke Marine, Kustwacht y tambe na Gobernador pa su sosten y atencion. Alavez ta pidi tur usuario pa porfabor yuda nos cuida e pier y evita di laga sushi atras ora boso saca boso boto.
“Sostene nos Cultura, practica Cria, Pesca y Agricultura”
