ORANJESTAD,Aruba
Manera anuncia previamente a logra contene e candela cu a surgi siman pasa. E efecto di huma a keda bastante y e calidad di aire no tabata completamente safe pa habri porta di biaha pa diferente servicionan di cuido. Ademas, a resulta cu tin asbest.
Siguridad di pashent, bishitante y empleado ta primordial pues esaki tabata un motibo principal pa no habri algun area y departamento.
E compania Douhsar NV cual ta specialisa riba e tereno di asbest ta encarga cu e procedura di asbest y e saneamiento di esaki. Area A, e area di construccion unda e candela a surgi a sali positivo pa asbest pues e area aki ta completamente cera.
Pa loke ta e edificio nobo (toren B) a midi asbest y tur departamento a sali negativo. E departamentonan unda cu e asbest ta negativo a pasa door di un limpieza profundo prome cu nan por a bira operacional bek. Pues nos departamento di Emergencia ta completamente bek den servicio. Esaki tambe ta conta pa e departamento di maternidad y departamento di mucha. Actualmente na B3 y B4 ta duna cuido di urgencia. Endoscopia tambe ta operacional bek. Departamento di rehabilitacion no ta accesibel ainda pero ta duna servicio unda cu por.
Testnan y/of limpieza riba otro pisonan den e edificio principal ainda ta andando y p’esey e entrada principal di Hospital ta cera ainda.
Orario di bishita ta sigui suspendi te cu proximo aviso. Mirando cu tin algun camber cu tin 3 pashent awo interna no por permiti aglomeracion. Logicamente tin excepcion pa algun pashent cu ta mas malo of muchanan interna cu mester di nan mayor.
Servicionan di departamento di radiologia ta ser atendi solamente cu cita. E entrada pa esaki lo ta na e parti patras unda normalmente tur pashent di dialyse ta drenta. Ora yega na e security e lo guiabo unda bo persona tin cu meld.
Si bo tin cu busca un remedi na Botica di HOH por fabor yama 527 4538 y e personal di Botica lo guiabo.
Servicio di LABHOH tambe a reanuda nan servicio mescos tur otro servicio cu ta wordo duna den nos edificio MOB dilanti na HOH. Corda si cu pa prik na LabHOH mester yama pa traha un afspraak na 5274901.
Operacionnan planea tambe ta keda suspendi. Te proximo aviso tin solamente operacionnan di emergencia. Si un mama tin cu duna luz e por acudi via e entrada di emergencia di Hospital y lo duna e guia necesario.
HOH kier gradici tur hende cu di un of otro manera a duna nan aporte durante e calamidad aki. Hopi trabou duro tras di cortina pa asina pronto nos por logra habri nos portanan ful bek na publico.