Den presensia di minister di Hustisia i Siguridat Yesilgoz-Zegerius ku kòrtamentu simbóliko di sinta, firmamentu di e Konbenio RIEC CN (Regionaal Informatie en Expertise Centrum Caribisch Nederland – Sentro Regional di Informashon i Ekspertisio Hulanda Karibense) a bira un echo.
RIEC CN ta un laso di kolaborashon di partnernan di siguridat pa haña mas bista riba e formanan den kua kriminalidat organisá i supversivo na Hulanda Karibense ta aparesé. Ta un aserkamentu integral, pero huntu ku esei sigur tambe monodisiplinario di kriminalidat supversivo, loke ta aportá na un Hulanda Karibense mas seif. Ta trata di un kolaborashon struktural entre algun partner, esta e entidatnan públiko Boneiru, Sint Eustatius, Saba, Ministerio Públiko BES, Kuerpo Polisial Hulanda Karibense, KMar, Servisio di Impuesto / Duana Hulanda Karibense, Asuntunan Sosial i Empleo, Servisio di Imigrashon i Naturalisashon, Unidat di Inteligensia Finansiero (FIU) i Wardakosta. LIEC (Sentro Nashonal di Informashon i Ekspertisio na Hulanda Oropeo) ta ofresé sosten riba sierto partinan. Ministerio di Hustisia i Siguridat ta sostené e ambishonnan akí i pa entre otro esaki a otorgá un aporte finansiero.
E prioridat di RIEC CN ta atendementu ku kriminalidat riba tereno di propiedat inmóbil, komèrsio i kontrabanda di hende, kriminalidat na aeropuerto i den haf i kriminalidat supversivo den hóreka. Esaki di manera ku por atendé ku e problema di Kriminalidat Organisá i Supversivo (Georganiseerde Ondermijnende Criminaliteit – GOC), ku ta tumando lugá den Hulanda Karibense tambe i ku ta manifestando su mes mas visibel den bida diario. Manera por ehèmpel droga ku hopi biaha ta prosedente di Suramérika, labamentu di kapital optené den forma kriminal entre otro den sektor di propiedat inmóbil i den hóreka, e formanan angustioso di komèrsio di hende den forma di eksplotashon seksual i laboral i organisashonnan kriminal ku tin ora ta hasi mal uso di pèrmit i supsidio i ku esaki ta sòru pa un simbiósis entre nos komunidat desente i baho mundu. E formanan di kriminalidat menshoná akí riba ta aparesé den Hulanda Karibense tambe.
Den kaso di atendementu ku e formanan akí di kriminalidat organisá i supversivo e punto di salida ta pa pone ‘e base na òrdu’, loke entre otro ta nifiká invertí den informashon konfiabel, hasi uso inteligentemente di kapasidat i aplikashon di legislashon i regulashon adekuá. Na mes momentu ta wak tambe den direkshon di kasonan ku por atendé konhuntamente. Pa loke ta trata regulashon minister di Hustisia i Siguridat a indiká ku un base legal ta parse nesesario pa investigashon di e personanan tras di petishonnan di pèrmit i ku mester wak kua ta e mihó manera pa implementá i apliká e ‘Lei Bibob’ òf un variante di esaki.
Pa e motibu akí lantamentu di RIEC CN ta pas sumamente bon den e agènda di maneho di ministerio di Hustisia i Siguridat, pasobra eiden tambe tin hopi atenshon pa kriminalidat supversivo i e ta konektá ku e kantidat di akshon ku partnernan di gobièrnu konhuntamente a ehekutá na Boneiru durante e añanan tras di lomba. Nan a topa ku prostitushon ilegal, fluhonan finansiero no muchu kla i posibel formanan di eksplotashon laboral.
Sinembargo e magnitut di kriminalidat supversivo den Hulanda Karibense te ainda no ta sufisientemente konosí. FIU-Nederland, e Unidat di Inteligensia Finansiero hulandes, den nan resúmen anual di 2021 a anunsiá sí ku na Hulanda Karibense den e aña ei tabatin 2257 transakshon no-usual i ku di eseinan a deklará 209 komo sospechoso ku un balor di mas òf ménos 38 mion euro. For di 2017 te ku 2021 balor di e transakshonnan sospechoso ta asta mas ku 130 mion euro. Kompará ku e kantidat di transakshon sospechoso na Hulanda Oropeo esaki por ta parse tiki, pero pa Hulanda Karibense esakinan ta sumanan grandi i pa kua nos no por sera nos wowonan.
